AMAIERA ONA, HASIERA HOBE BATERAKO

Oporretan da jada Reala. Etxeko lanak ondo eginda gainera. Ahoan irribarre zabala dutela iritsiko dira jokalariak etxera Gabonetan. Izan ere, lehenengo itzulia amaitzeko bi partida falta direnean 25 urte pilatu ditu taldeak. Bolada bikainean sartu dira txuri-urdinak, zazpi partida daramatzate galdu gabe, eta agurreko norgehiagokan 2-1 irabazi diote Sevillari, partida gogor baina osoan. Velak lehen zatian aurreratu zuen Reala, ondo gorpuztutako jokaldi batean; Medelek berdinketa bigarren zatiaren hasieran sartu zuen eta De la Bellak sartu zuen garaipenaren gola.

2012-2013ko ajeetako baten ondorioz, ez bururik ez hankarik ez duen ordutegi dantzaren erruz, ostegun bateko 22:00etan jokatu zuen Realak. Halere, 20.000 zale inguruk bete zituzten harmailak. Ondo doa taldea, eta merezitako agurra eman nahi zioten jokalariei. Zaleen beroa eskertzeko, elastikoan horietako 11ren izena eramateko ekimena bultzatu zuen taldeak. Polita ideia.

Sevilla garaitu ondoren, garaia da Europa tabu gisa ezabatzeko. Egia da Europan lehiatzeaz hitz egin den bakoitzean taldeak txakalaldia eduki duela eta huts egin duela. Baina jokalariek duten mailarekin, erakusten duten joko onarekin, maila mantentzea baino erronka altuagoetan saiatzeko obligazioa dago. Atzo erakutsi zen bezala. Lehenengo zatiko une batzuetan denboraldiko minutu onenak jokatu zituzten txuri-urdinek. Gozamena da Pardo baloia oinetan ikustea; etengabe eskaintzen da errioxarra, eta hegal batera zein bestera azkar mugitzen du baloia. Bitartean, Illarramendi hazi eta hazi ari da, etengabe. Iñigo Martinez eta, batez ere Mikel Gonzalez, sendo ari dira. Zer esan hegaleko atzelariez; kritika gogorrak entzun ondoren, inoiz baino hobeto dabiltza De la Bella eta Carlos Martinez, konfiantza betez ikus daitezke. Erasoan kosk egiten dute Vela, Ifran, Griezmann eta Prietok, eta defentsa lanetan erruz laguntzen dute.

Lehen zatian erakutsitako maila onaren erakusle izan zen lehenengo goleko jokaldia. Bravok geldiketa erraza egin ondoren azkar atera zuen baloia eskuarekin. Azkarregi agian, albotik aterako zela zirudielako; baina De la Bella azkar-azkar mugitu zen ozta-ozta iristeko. Griezmanni pasa, eta frantziarrak bat-biko azkarra gorpuztu zuen Illarramendirekin; Velari pasea eta mexikarrak, sareetara. Gol bikaina.

Aukera gehiago izan zituen Realak, Pardoren erremate bortitza kasu, baina ez zen aldaketarik egon. Zaleek gogor eskatu zuten Spahicen bigarren txartela Ifrani sarrera zakar bat egin zionean, baina epailea ez zegoen Sevilla jokalari bat gutxiagorekin uzteko prest. Anoetan argi geratu zen gaur egungo Sevilla ez dela aurreko urteetako aurkari beldurgarri hura. Iparrik gabe aritu zen, jokoa sortu ezinik. Baja garrantzitsuak zituen, baina maila kezkagarria eman zuen. Ez zegoen Navasen, Reyesen eta Del Moralen berririk. Medel saiatzen zen jokoa sortzen eta Negredo ez zen gai bera bakarrik probetxuzko ezer egiteko. Oso gris aritu zen.

Baina futbola zer den. Bi jokaldietan guztia alda daiteke. Lehen zatian bezala, Reala jaun eta jabe izango zela zirudien. Hasi eta berehala jokaldi bikaina egin zuten, luzea, landua. Baloia ia jokalari guztietatik pasa ondoren, Griezman ezker hegaletik area barneraino sartu zen, eta Prietori baloi bikaina eman zion. Donostiarrak huts egin zuen. Huts handia. 2-0ekoa gertu izan zen. Baina banakakoa iritsi zen hurrengo jokaldian. Negredoren erdiraketa urruntzeko garaian huts egin zuen Bravok. Navasen pasea hanka tartetik pasatzen utzi zuen Reyesek eta Medelek barrura bidali zuen. Huts egitea eta gola sartzearen arteko desberdintasuna.

Mina egin zion golak Realari. Ukabilkada gogor bat jaso ondoren zabuka dabilen boxeolaria bezala. Bat-batean, Pardoren eta Prietoren arrastorik ez zegoen. Griezmannek ez zuen hainbeste laguntzen defentsan eta Illarramendi gizajoa ez zen zelai erdiko odoljarioa bera bakarrik geratzeko kapaz. Une gogorrak izan ziren, minutu zailak. Sevillak bizpahiru aukera izan zituen golak hauspotuta. Edozein unetan kanpokoen bigarren gola etorriko zela zirudien. Montanierrek aldaketak egitea erabaki zuen, joera aldatu asmoz. Baita asmatu ere. Erabaki arriskutsua egin zuen, Pardo kentzea; harmailaren haserrea jasoko zuela bazekien arren. Errioxarrak norgehiagoka grisa jokatu zuen, baina zaleen gogokoena da.

Zurutuza zelaira sartzearekin batera asko hobetu zuten txuri-urdinek. Minutu gutxira etorri zen gola. Velari area barnean iritsi zitzaion baloia. Erdira jo zuen apur bat, atzelarien arreta bereganatuz. Hegaletik Carlos Martinez iristera itxaron zuen hari pasea emateko. Nafarraren erdiraketa De la Bellak sartu zuen. Hegaleko atzelaritik, hegaleko atzelarira; taldearen anbizioaren erakusle. Sevillaren golak Realari min egin bazion, zer esan Realaren golak Sevillari egin zion minaz. Oso buru-arina da Andaluziako taldea. Zailtasunak datozenean, segituan jaisten dute burua. Hala, berdinketaren bila jo beharrean, ostikoak ematen hasi ziren. Oso zakar aritu ziren. Cokek txartel gorria ikusi zuen, baina ez zen harritzekoa izango epaileak beste pare bat jokalari ere kanporatu izan balitu. Montanierrek beste pare bat aldaketa egin zituen partida amaitu aurretik. Chory Castro sartu zuen Velaren ordez eta Agirretxe Ifranengatik —txikituta bukatu zuten mexikarrak eta uruguaitarrak—.

Sevillak baino izaera gehiago erakutsi zuen Bravok. Golean egindako hutsa ahaztu, eta sendo aritu zen ordutik. Sevilla jokalari bat gutxiagorekin zegoen, baina apurka bultzakada txikiren bat emateko prest zegoen. Halako bultzada batean kornerra lortu zuen. Kornerrean oso gertu egon zen gola. Bravok izugarrizko geldiketa ona egin zuen; 87. minutua zen. A ze lasaitua hartu zuten zale batek baino gehiagok. Batez ere Prietok eta Agirretxek ate aurrean bakar-bakarrik bi aukera garbi huts egin zituztelako.

Esan bezala, bolada onean dago taldea, eta oporretako etenaldiak ondo hausnartzeko balio du. Bueltan Santiago Bernabeun jokatuko dute txuri-urdinek, Real Madrilen aurka. Plaza zaila zinez, baina noizbait puntuatzekotan, orain izan liteke, oso nahasi baitatoz urak Madrilen. Mourinhoren eta jokalarien arteko dibortzioa bistakoa da, eta presidenteak berak eta zaleek ere jada gehiago ezin dutela dirudi. Hiru urtez elikatu duten munstroak gainezka egin du.

Jokalari onenak:

3.- Asier Illarramendi: Izugarrizko erakustaldia eman zuen berriro mutrikuarrak. Ruben Pardo itzalduta, berak bakarrik eutsi zuen taldea, Sevillaren erasoak moztuz eta Realaren erasoa hasiz.

2.- Carlos Vela: Partida hasierako gola sartu eta amaierakoa eraiki. Erasoan min egiteaz gain, defentsa lanetan asko lagundu zuen.

1.- Carlos Martinez: Non dago zaleek iseka egiten zioten atzelari grinatsu hura? Grina ez ezik teknikoki ona dela erakutsi du nafarrak. Txapela kentzeko moduko jokaldiak egin zituen, eta gainera, bigarren goleko pasea eman zuen.