ZELAI GAINEAN HITZ EGITEN

Ahaztu Iñaki Badiola, Eufemiano Fuentes eta Rsoc. Futbola zelai gainean gozatzen da, ez bulegoetan. Eta Realak argi eta garbi hitz egin zuen Romaredan, Europa hizpide zuen bakarrizketa batekin. Garrantzi handiko hiru puntu eskuratu zituen, Zaragozari 1-2 nagusitasunez irabazita. Azkar jarri zen partida txuri-urdinen alde, eta lasaitasun handiz jokatu zuten gero. Zazpigarrena da jada Reala, Europako lehian buru belarri murgilduta. Ligako une erabakigarriari aldarte onez eta konfiantza osoz ekingo dio Realak.

Mallorcaren aurkako partida ona izan zen arren, aldaketak egitea erabaki zituen Montanierrek. De la Bella eta Markel hamaikakora itzuli ziren Jose Angelen eta Pardoren kaltetan. Errioxarrak 90 minutu jokatu zituen asteartean Espainiako 21 urtez azpiko selekzioarekin eta teknikariak atseden ematea erabaki zuen. Berbera egin zuen Chory Castrorekin, Catarreraino joan eta etorri egin ondoren aulkian uztea hobe zelakoan. Castro aulkian utzita eta Ifan min hartuta zeudenez, Agirretxek bere aukera izan zuen, ondo probestua gainera.

Neurtze lehen minutu batzuen ondoren, segituan jarri zen Reala aurretik. Ordura arte Zaragoza zen arerioaren atera gehien hurbiltzen ari zena, baina defentsan hanka sartu ondoren, Griezmannek sartu zuen gola. Velak pase bikaina eman zion frantziarrari eta ez zuen hutsik egin Robertoren aurrean. Pixkanaka bere maila errekuperatzen ari da gaztetxoa. Maldan behera jarri zitzaien partida txuri-urdinei hamargarren minutuan, eta are errexago jarri zitzaion hamar minutu geroago. Hectorrek txartel gorria ikusi zuen Velari bi falta gogor egin ondoren. Bi txartelak argiak izan ziren eta epaileak ez zuen zalantzarik izan. Txuri-urdinak jokalari bat gehiagorekin jokatzera ohitzen ari dira jada.

Aurreko partida askotan jokalari bat gehiagorekin jokatzean asmatu ezinik ibili dira txuri-urdinak, baina ez zen hala izan Romaredan. Zaragozak erraztasun ugari eman zituen eta oso partida lasaia izan zuten txuri-urdinek. 30. minutuan amaitu zen partida behin betiko. Agirretxek Illarramendiren pasea bikain kontrolatu zuen, eta saretara bidali zuen baloia zartako gogor batekin. Txakalaldi luze bat izan ondoren, bere aukerak baliatzen ari da azkenaldian Agirretxe. Titular izateari utzi dio, baina Bartzelonaren aurkako gol erabakigarriak eta atzokoak hamaikakora bidera dezake usurbildarra.

Bigarren gol horrekin, Zaragozak amore eman zuen eta zakukada bat gol jasotzeko prestatu zen. Ez zen txuri-urdinen beste golik etorri ordea. Jokalariak eroso zeuden, Carlos Martinez eta De la Bella erasoan agertzen ziren, Prietok, Velak eta Griezmannek bat-bikoak egiten zituzten eta Illarramendi zen lemazaina; baina ez zuten minik egiten. Jolasean zebiltzala zirudien. Ez zuten behartzeko beharrik, eta partida hiltzen utzi zuten. Baten bat baino gehiago ez zen gustura geratu txuri-urdinek atzo emandako emaitzarekin.

Lehen zatian gozatu ondoren, bigarren zatia ez zen hain ona izan. Defentsak sendo aritu ziren, baina erasoko argia itzali zen. Aukera garbi bat baino gehiago izan arren, kamuts zebiltzan. Hala, amaitzerako, lokartu egin ziren txuri-urdinak eta Markelek penalti garbia egin zion Helder Postigari luzapenean. Apoñok panenka erara sartu zuen baina ez zegoen gehiagorako astirik. Garaipen erosoa izan zen.

Zaragozari irabazita, 36 puntu ditu Realak, eta zazpigarren postuan sailkatuta dago, Betisek Valladoliden aurka egingo duenaren esperoan. Europako postuetan dira txuri-urdinak, izan ere Malagaren zigorra medio, zazpigarrena Europarako sailkatuko da aurten, eta Atletico Madril Espainiako Kopako finalera iristen bada, zortzigarrena ere Europara joango da. Amesten hasita, Txapeldunen Liga ere oso gertu du Realak. Laugarren postua hiru puntura dago, eta bosgarrena puntu bakarrera. Real Madrilen kontrako porrotetik galdu gabe dago Reala, puntuak bereganatzen eta bereganatzen. Hurrengo partidan Levante hartuko dute txuri-urdinek, arerio zaila eta ofizio handikoa. Oraingo mailarekin jarraituz gero, handia egin dezake Realak. Derbira Europan irits daitezke txuri-urdinak.

3.- Carlos Vela: Asistentziak eman, aurkariak erotu, txartelak probokatu... Esne mamitan dago mexikarra, eta gozamena da hura ikustea.

2.- Imanol Agirretxe: Ixil-ixilik, azkenaldian aulkian minutu ugari pasata, baina gol garrantzitsuak egiten. Bartzelonaren aurka garaipena eman zuen bere golak eta atzo lasaitasuna ekarri zuen. Mugimendu interesgarriak egin zituen gainera.

1.- Antoine Griezmann: Frantziako 21 urtez azpiko selekzioarekin izan zuen aferak kalte handia egin zion eta denboraldi hasierako jokalari trebe eta abila desagertu egin zen. Apurka ari da itzultzen.