AIZTOA PREST

Ez da aste samurra izan Philippe Montanierrentzat. Betisen aurkako garaipenak zapore gazi-gozoa utzi du txuri-urdinen artean.. Zuzendaritza arduratuta geratu zen entrenatzaileak partidan hartu zituen erabakiekin. Bi goleko errenta izan ondoren, andaluziarrek partida berdintzeak kalte handia egin dio Montanierri, eta jakina da 85. minutuan Frantziarako bidean zela. Iñigo Martinezen zartakoak salbatu zuen soilik. Gauzak hala, berriz ere arriskuan du bere postua Montanierrek asteburu honetan, eta Malagaren aurka emaitza on bat lortu ezean, etxerako bidea hartuko du. Aiztoa prest daukate Lorenek eta Jokin Aperribaik, eta ordezkoa ere hitzartuta dutela dirudi. Julen Lopetegik eta Manolo Jimenezek gertutik jarraituko dute igandeko norgehiagoka badaezpada ere (16:00, C+L2/PPV).


Bolada txarra eten ostean, bigarren garaipena erreskan lortzeko asmoa du Realak. Anoetaren babespean, jaitsiera postuetatik urrundu nahi dute txuri-urdinek, baina horretarako partida borobila egin beharko dute. Ez dirudi De la Bella eta Cadamuro garaiz osatuko direnik; beraz, seguru aski Estradak jarriko da ezkerreko atzelari gisa. Mikel Gonzalezek ere hamaikakoan jarraitu dezake, oso itxura ona eman baitu jokatu duen bi partidetan. Erditik gora ditu zalantza gehienak Montanierrek. Zaleen pazientzia agortu da Marigarekin, eta entrenatzailearena ere bide beretik doa. Ez harritu, beraz, Elustondok Aramburu eta Zurutuzarekin jokatzen badu.

Xabi Prieto ere hamaikakora itzuli daiteke. Horrek Vela ezker hegalera mugituko luke, eta Griezmannek aulkitik ikusiko luke partida. Agirretxek eta Llorentek gol bana sartu dute azken bi partidetan (Betisen eta Eibarren kontra, hain zuzen ere). Montainerren beste aukera Vela aurrelari gisa jartzea da, Griezmann edo Agirretxe ezker hegalean kokatuta. Aukera asko ditu entrenatzaile frantziarrak, eta hamaikakoan aldaketak egitearen zale da gainera. Nolanahi ere, berme handiko hamaikakoa egin dezake.

Malaga, Europako postuetan egonkortuta

Aurkari gogorra izango du, baina, Realak aurrean. Hazita dator Malaga. Petrodolarrei etekina ateratzen hasi da, eta Europarako postuetan egonkortuta daude andaluziarrak dagoeneko. Azken partidan, astehelenean, 2-1 garaitu zuten noraezean dabilen Vila-real. Horrez gain, partida txukunak egin ditu beti Malagak txuri-urdinen aurka. Lehengo urtean azken postuan zegoela etorri zen Donostiara, Manuel Pellegriniren postua zalantzan zegoela. 0-2 irabazi zuten, eta goraka bidean jarri ziren andaluziarrak. Gaur egun arte. Realak alderantzizko bidea hartu zuen pasa den denboraldian, sufritzen amaituta.

Toulalan frantziarra hasierako hamaikakoan izango da. Txartel gorria ikusi zuen Vila-realen aurkako partidan, baina Diziplina Batzordeak baliogabe utzi du bigarren txartela. Monreal, Van Nistelrooy, Maresca, Joaquin, Gamez, Eliseu eta Baptista min hartuta daude. Lehenengo biak Anoetan izango dira ziurrenik, baina gainontzeko guztiek etxetik jarraituko dute partida. Jokalari garrantzitsuak dira gehienak, baina sakonera handiko taldea du Malagak. Atzelariek erne ibiliko behar dute Cazorlarekin eta Iscorekin. Oso partida onak egiten ari dira biak. Gaztetxoa izan da taldeko onena azken bi partidetan. Pardorekin jokatu zuen 19 urte azpiko Eurokopan.