EZAGUNA DUTE BIDEA

Konfiantzaz gainezka iritsiko da Reala Racingen aurkako igandeko partidara (19:45). Philippe Montanierrek hanka eta erdi taldetik kanpo zuenean, itxuraldatu egin dira txuri-urdinak. Emaitzak alde dituzte orain Betis, Malaga eta Granadari irabazi eta Vila-realekin berdindu ostean. Emaitzak bakarrik ez, jokoa ere aldatu da azken partidetan, ondo eta serio jokatu baitute. Asteartean Granadaren aurka jokatu zuten lehenengo zatia txapela kentzeko modukoa izan zen, eta aurrelariek bigarren zatian izan zituzten aukera guztietan asmatu izan balute emaitza ikaragarria izango litzateke. Jokalariek, beraz, ezaguna dute jarraitu beharreko bidea.

Hazita doaz, beraz, Sardineroko partidara, eta garrantzitsuena: garaipen gosez. Granadaren aurkako garaipena akuilu izan da gutxien jokatzen ari zirenentzat. Xabi Prietok hamaikakoan egon behar duela erakutsi zuen. Betiko Antoine Griezmann ikusi genuen berriro, ziur aski Anoetan jokatu duen partidarik biribilenean. Kalitatea, borroka eta kasta bat izan ziren. De la Bellak asko eskertu zuen Maçonekoaren lana defentsan, eta beste behin ere elkarrekin ondo ulertzen direla erakutsi zuten —gogoangarria hirugarren gola sartzeko eginiko jokaldia—. Joseba Llorenterentzat ere pizgarria izan zen. Golik sartu ez zuen arren, aspaldi zeraman 90 minutu jokatu gabe, eta zelaian erakutsi zuen gogoa eta presioa eskertzekoa izan zen. Lehen golan maisuki eraman zituen atzelariak Griezmannek atea bakarrik zulatu zezan, eta bigarren golan aldaratzea hartzeko egindako korrikaldia erabakigarria izan zen. Diego Ifranek beste behin ere erakutsi zuen Realan arrakasta izateko haina maila duela; gol bat sartu zuen eta bi aukera garbi izan zituen, non atezaina asko behartu zuen. Uruguaiarrak jada ez daki zer egin behar duen minutu gehiago izateko, eta baliteke Gabonetako merkatuan minutu gehiagoren bila ateratzea.

Halako partida baten ostean, jarraipena ematea garrantzitsua da. Kopa asteazkenean itzuliko da, baina aurretik Ligako partida dute txuri-urdinek. Racing oso talde indartsua ez izan arren, ez da erraza hiru puntuak han lortzea. Aurkako giro latza izaten da Sardinerokoa euskal talde guztientzat. Defentsa erdialdean Mikel Gonzalezek eta Iñigo Martinezek jarraitzea izango litzateke normalena. Eskuin hegalean Carlos Martinez sendo dabil, eta badirudi Dani Estradak Alberto de la Bellari aurre hartu diola ezker hegaleko lehian. Zarauztarrak maila ona eman du orain arte berea ez den postuan, eta kataluniarrak kirol legez hartu du egoera. Hala eta guztiz ere, lekua berreskuratzeko prest dagoela argi utzi zuen asteartean, aspaldi eman gabeko maila eman ondoren. Zalantza gehienak erdian ditu Montanierrek.

Elustondo aspaldi eman gabeko maila ematen ari zen, baina aste batzuk taldetik at eman beharko ditu lesio berri baten eraginez. Hala, Aranburu, Mariga, Zurutuza eta Pardo daude hiru postutarako borrokatzen. Gaztetxo errioxarra ate-joka dabil, titular gisa izan dezakeen lehen aukeraren eske. Dena den, ziurrenik Marigak hartuko du Elustondoren lekua. Kritika guztien jomuga izan ondoren, ez zuen guztiz gaizki jokatu Granadaren aurka, eta Anoetako presiorik gabe bere mailarik hoberena eman beharko luke. Aurrealdeko arazoa erabat desberdina da. Joko bolada onean daude ia jokalari guztiak: lesioa alde batera utzita, betiko Xabi Prieto ikusi genuen asteartean; Velak kalitateaz gain gola ere baduela erakutsi du; Griezmannek atzean utzi ditu udarako kontu ilunak;  Llorentek amaiera arte presionatzen jarraitzen du; Agirretxek golak sartzen jarraitzen du eta Ifranek dituen minutu apurretan gol garrantzitsuak sartzen ditu. Zein hamaikakoan jarri baino, zein hamaikakotik kanpo utzi da Montanierren erronka. Dena den, batzuek edo besteek jokatu talde ona zelairatu dezake frantziarrak.

Urak nahasi Santander aldean

Racing ez dago oso egoera onean. Ali Syed indiarra akzionista nagusi bihurtu zenetik, ez da giro Santander aldean. Dirua eta garaipenak promestu zituen, baina ez du ez bat ez bestea egin. Dirurik gabe jarraitzen du Syed, eta justiziarekin hainbat arazo dituela zabaldu dira. Egoera horretan, Konkurtso Legean jarraitzen du Racingek. Giro instituzionala txarra bada, are txarragoa da zelai gainean dagoen egoera. Jaitsiera postuetan murgilduta dago Racing 13 punturekin; Realak baino 3 gutxiago. Athleticen aurka ozta-ozta berdindu zuen, luzapenean Alvaro atzelariak sartutako golari esker. Etxean jokatutako azken partidan 1-0 irabazi zuen Stuaniren golari esker. Kopan 3-2 irabazi zuen pasa den asteartean Rayoren aurka.Ezohiko jokalari askok jokatu zuten, eta Stuanik bi aldiz eta Arielek behin sartu zituzten golak.

Hector Cuper entrenatzaile famatuak orain hilabete dimisioa eman zuen, bere burua Racingen norabidea zuzentzeko indarrik gabe ikusi zuenean. Zuzendaritzak ezohiko erabakia hartu zuen orduan, eta entrenatzaile berri bat fitxatu beharrean, hiru jarri zituen karguan: Juanjo Gonzalez, Pablo Pinillos eta Fede Castaño. Hiruen artean Gonzalezek darama aginte makila. Fitxatzeko dirurik gabe harrobiko jokalarietan oinarrituta dago Racing, lau-bost kanpotarrekin. Lauro Acosta azkarra, Pedro Munitis beteranoa eta Christian Stuani dira aurkariaren jokalari arriskutsuenak. Talde sendoa dira atzean. Toñok segurtasun handia ematen du bere irteeratan eta bat baten aurkakoetan erakusten duen erreflexuekin. Defentsa gogorra du Racingek, 21 gol jaso ditu Realak baino bi gutxiago. Arazo nagusiena golarekin dute, baina, 10 besterik ez dituzte sartu eta. Gol horietako erdiak buruz sartu dituzte, erne ibili beharko dute beraz atzelariek erdiraketetan, eta, batez ere, geldikako jokaldietan.

Ur nahasietan atzamarrak sartu nahi dituzte txuri-urdinek, zauria sakontzeko. Hiru puntuko tartea besterik ez dago bi taldeen artean, eta Realak irabaziz gero arerio zuzen bat kinka larrian utziko luke. Partida garrantzitsua da, beraz. Iaz 2-1 irabazi zuen Racingek, Kennedy eta Giovaniren golei esker. Bost jokalariko defentsa jarri zuen Lasartek orduan, kritika asko jaso zituen, eta taldea beheraka begira hasi zen. Gerora, Lasarte taldetik botatzerakoan Santanderrekoa bezalako partidak gogoratu zituen Lorenek. 2004-2005 denboraldian irabazi zuen azkenekoz Realak Sardineron. 23. jardunaldian Aranburuk eta Nihatek birritan sartutako golei esker 1-3 irabazi zuen taldeak. Antzeko egoeran zeuden bi taldeak, Racing jaitsiera postuetan itota, eta Reala hurbil, bi puntura. Azken hilabeteko joko boladari eutsiz gero, gertu izango du garaipena taldeak.