JARRAIPENA EMAN BEHAR DIO

Aukera ezin aproposagoa du Realak igande honetan (16:00, C+Liga, GolT). Hirugarren partida erreskan irabazi dezake, horietako bi etxetik kanpo jokatu izanaren balio erantsiarekin, gainera. Giroa erabat lasaituko luke Vila-realen aurka hiru puntuak lortzeak, eta urtea bukatu arte leku erosoan geratuko litzateke taldea, hamabost partidatan hemezortzi puntu irabazita; orain gutxi itotzen zuen jaitsiera postuetatik urruti. Horregatik, bolada onari jarraipena eman behar diote txuri-urdinek Madrilagen.

Partida zaila du, bai, Vila-real Espainiako Ligako talderik onenetarikoa delako. Baina, egiari zor, oso makal aritu da urpekari horia denboraldi osoan. Europatik at geratu dira, puntu bakar bat ere lortzeko gai izan gabe. Talde gogorra zuen Txapeldunen Ligan ¾Bayern Munich, Napoli eta Manchester City¾, baina zerbait gehiago egiteko gai izan behar zuen. Ligaren ere gorriak eta bi ikusten ari dira, eta larri antzean dabil. Hamabosgarren postuan dago, Realak baino puntu bat gutxiagorekin. Pentsatzekoa da behin Europako betebeharrez libre, gora begira hasiko direla orain. Horregatik, egoera irauli aurretik azken sastakada emateko aukera du Realak.

Estastikak ere txuri-urdinen alde daude. 1998/99 denboraldian lehen aldiz jokatu zutenetik ¾bana berdindu zuten¾, bederatzi aldiz jokatu du Realak Madrigalen: hiru partida irabazi ditu, hiru galdu eta hiru berdindu. Aurreko denboraldian 2-1 galdu zuen, Aranburuk taldea aurretik jarri zuen arren. Azken garaipena 2006an erdietsi zuten txuri-urdinek. Vila-Real Txapeldunen Ligako finalera iristeko lehian zegoen, eta Realak 0-2 garaitu zuen talde hura.

Ezin aproposagoa da, beraz, Castello alderako bidaia. Juan Carlos Garrido larri antzean dabil, eta zaleak bere dimisio eske hasi dira dagoeneko. Lesioekin arazo ugari izan ditu Garridoren taldeak, eta horietako batzuk berreskuratu dituen arren, oraindik osatu gabe daude beste batzuk. Giuseppe Rossik agur esan dio denboraldiari, eta Nilmar bi hilabetez min hartuta ibili ondoren lehen minutuak jokatu ditu orain dela gutxi. Brasildarrak ziurrenik minutuak izango ditu txuri-urdinen aurka, baina bere egoera fisikoa oraindik kezkagarria da. Bitartean Marco Rubenek hartu behar izan du erasoko erantzukizun osoa, eta jokalari trebea izan arren, ezin izan du maila altua mantendu. Harrobiko jokalari askok bere aukera izan dute, baina ez dirudi lehen taldera igotzeko moduan dauden oraindik. Camuñas, Zapata eta Bordas ere osatu egin dira, eta Realaren aurka jokatzeko moduan egongo dira.

Realan ere osatu dira min hartuta zeuden jokalari gehienak, baina zaila izango dute hasierako hamaikakoan egotea. Philippe Montanierrek ez zuen hamaikakorik errepikatu Malagaren partidara arte. Talde berdinarekin bi partida jarraian irabazi ditu taldeak, eta berriro haien alde egin dezake frantziarrak. Xabi Prietok eta Alberto De la Bellak aulkitik ikusiko lukete partida, beraz. Carlos Vela, Antoine Griezmann eta Imanol Agirretxe oso maila ona ematen ari dira. Horregatik, Prieto taldeko jokalari talentudunena den arren, hamaikakotik at geratu da. Dani Estradak ez du hain maila ona eman, txukun aritu den arren. Eskuin petoa izanik, asko sufritu du ezker hegalean defenditzen. Hala eta guztiz ere, zaleek gogoan dituzten jokaldiak egin ditu, eta berak eman zuen Malagaren aurkako lehenengo golaren pasea ¾ezker oinarekin¾. Kataluniarrak argi adierazi du astean zehar Estradak hala jarraituz gero, berak oso zaila izango duela hamaikakora itzultzea. Zelaierdian titular jarraitzeko eskubidea irabazi du Gorka Elustondok, Asier Illarramendi itzuli arte, behinik behin. McDonald Marigak asko hobetu beharko du minutuak izateko.

Deialdia zehaztu gabe dago oraindik, baina Ifranek hor egon beharko luke. Montanierren gogokoa ez den arren, lekua baduela erakutsi du uruguaitarrak. Lehia bizia dago hamaikakoan sartzeko, eta hori berri ona da, jokalariek argi dutelako lo hartuz gero kanpoan geratuko direla. Beldurrak eta aldarte txarrak nolabaiteko lasaitasunari bidea eman diote. Izan dezala jarraipena!