EZ DUTE BERPIZTU NAHI

Ezohiko asteburu baten ondoren, Ligako partida dauka Realak gaur Sevillaren aurka (21:00, Gol TV, Canal + Liga 2). Andaluziarren aurka jokatzea talde ahaltsu eta hobeago baten aurka jokatzearen sinonimoa izan da azken urteotan. Baina, aurten, inoiz baino parekatuago daude indarrak, eta sailkapena ikusita, garaipen garrantzitsu baten bila aterako da taldea. Hondoratuta dabil Sevilla, entrenatzailea aldatu berri du egoera irauli asmoz, eta Realak ez du izan nahi lehenengo biktima. Irabaziz gero, sailkapenean arnasa hartuko lukete txuri-urdinek, eta, gainera, andaluziarrei aurre hartuko liokete.

Urak lasai jaitsi dira Zubieta aldean aste honetan, Bartzelona ahaltsuaren aurka galdu arren, itxura ona eman zelako. Min hartuta zeuden jokalariak apurka sendotze bidean daude gainera. Elustondo jokatzeko moduan egongo da gaur, eta Zurutuza eta Illarramendi hobetzen doaz, eta pare bat astetan hamaikakoan egon litezke. Arrazoi horiek direla eta, gutxi begiratu da sailkapenera. Astelehenean jokatzeak aurreko talde guztiek egin dutena ikusteko aukera ematen du, eta uneotan txuri-urdinak jaitsiera postuetatik puntu bakarrera daude. Dena den, sailkapena hain dago estutua, gaur irabaziz gero 11. postuan legokeela taldea.

Bartzelonaren aurka jokatu zuen taldeari jarraipena emango dio ziurrenik Montanierrek. Aldaketa bakarra zelai erdian etorriko da, behin osatuta, Elustondok hasieratik jokatuko baitu. Pardo edo Bergara kendu behar ditu horretarako. Defentsa lanetan iaioagoa da Elgoibartarra, baina errioxarrak itxura ona eman du jokatu duen minutu gutxietan, eta zaleek gazteak minutu gehiago edukitzea nahi dute. Aurreko hirukotean, Agirretxe hamaikakora itzuliko da, eta baliteke Velak hartzea Xabi Prietoren lekua. Taldeko jokalari onenetakoa da Prieto, baina ez dabil sasoiko. Ustekaberik ezean, atzeko laukotea Bartzelonako berdina izango da. Cadamuroren ordez Estradak joka dezake akaso. Argeliako selekzioarekin jokatzeko deia jaso du Cadamurok.

Defentsan gogor eta kontraerasoan azkar ibili beharko du Realak gaur. Hegaletatik mina egin dezake. Ezkerretik Fernando Navarro beteranoak jokatuko du. Erdiko atzelari gisa jokatu izan du, eta ez da jokalari azkarra. Eskubian Coke gazteak jokatuko du, jokalari azkarra eta erasoan ibiltzeko ohitura duena, baina defentsan nahiko sufritzen duena. Griezmannek etekina atera dezake hor. Defentsan kontuz ibili beharko dute Negredorekin eta Kanouterekin. Malikoak begiz jota du Reala, eta beti maila izugarria ematen du txuri-urdinen aurka jokatzen duenean.

Sevilla, ezinean

Ez da ohikoa Sevilla sailkapenean hain azpian ikustea. Txapeldunen Ligarako eta Europa Ligarako lehian ibili da azken urteotan. Monchik begi onez fitxatutako jokalari apartek maila izugarria eman dute. Joaquin Caparrosekin eman zuen goia taldeak, eta gerora Juande Ramosek, Manolo Jimenezek eta Antonio Alvarezek maila ona mantendu dute. Dena dela, azken bi urteetan gainbeheran dago taldea. Monchik jada ez du hainbeste asmatzen fitxaketak egiteko orduan, eta saldutako jokalariak ez dira era egokian ordezkatu. Gainbehera horren isla da egungo Sevilla. Jada ez dira hain oldarkorrak defentsan, eta erasoan kamuts dabiltza Navas eta Negredo bezalako jokalariak. 22 gol sartu dituzte soilik.

Gregorio Manzanok iaz ez zuen ondo bukatu Sevilla aldean, eta aurten Marcelinok gutxiago iraun du. Del Nidok pazientzia gutxi du askotan, baina Sevillaren aurtengo emaitzek guztiak akitu ditu. Jokalarien eta Marcelinoren artean ez zegoen harreman ona, eta Kanouterekin arazo ugari izan zituen. Etxean Vila-realen aurka partida kaskar batean galdu ondoren bota dute taldetik, eta Michel ekarri dute. Real Madrileko jokalari ohiak taldea bide zuzenera eramango duen esperantza dute andaluziarrek, baina lan eskerga egin beharko du. Giro nahasi samar dago, eta aste honetan Spahicek eta Medelek ukabilka amaitu zuten entrenamendua. Michelek biak deialditik kanpo uztea erabaki du, biak titularrak diren arren. Bosniarraren hutsunea Cala gazteak beteko du.

Zelai erdian kalitate handiko jokalariak ditu Sevillak. Rakitic, Trochowski, Navas eta Del Moralek edozein partida irauli dezakete. Etxeko kuttuna, Reyes, etxera itzuli da gainera, orain hamar bat urte Londresera bidean joan eta gero. Dinamita asko daukate andaluziarrek, baina dinamika txarra aldatzea ez da erraza izango. Aukera hori probestu behar du Realak, eta nahasita dagoen giroa are nahasiago bihurtu. Entrenatzaile berriak garaipena ekartzen duela esan ohi da, eta txuri-urdinek galbidean doazen taldeak berpizteko ohitura dute. Aspirina izateari uzteko aukera dute gaur.