LANGA GAINDITZEKO GARAIA

Ez dago zalantzarik, Reala goraka doa. Taldea hazten ari da. Tentuz, eta jaitsiera postuei zeharka begira, baina pauso irmoz aurrera. Goizegi da marra non dagoen jakiteko. Txapeldunen Liga? Europa Liga? Hitz handiegiak orain hiru urte Bigarren Mailan zegoen talde batentzat. Baina ukaezina da azken urteetan ereindako uzta biltzen ari direla txuri-urdinak. Harrobiko jokalarietan oinarrituta, jaitsiera arriskutik urrundu eta helburu lehiakorragoei ekiteko moduan dago taldea. Langa bat dute gainditzeko. Gazte izanik, samurregi dira askotan; azken hogei urteotako gaitza. Eta horrek porrotak ekar ditzake. Baina jokalari hauek ez dute inauteririk behar magoz mozorrotzeko. Dakiten bezala jokatuz gero, urrutira iritsiko dira, Granadari bihar (12:00 C+L2 / PPV) irabaztera bai, bederen.

Sevillaren aurka garaipen bikaina lortu ondoren, bolada ona mantendu nahi du Philippe Montanierren taldeak. Aspaldi jokatutako partida onena izan zen astelehenekoa, eta zaleak gustura atera ziren Anoetatik, talde indartsu bati irabazi ondoren. Horregatik, ilusioa nagusi da Granadaren aurkako partidan. Ligan, Anoetan 1-0 irabazi zuten txuri-urdinek, Estradaren gol paregabe bati esker, eta, Kopan, Anoetan 4-1 irabazi ondoren 2-1 galdu zuten itzuleran. Elkarren aurka hiru aldiz jokatu ondoren, badakite zer duten aurrean, eta Realak badaki Granada baino gehiago direla.

Jokalari ugari min hartuta zeuden Sevillaren aurkako partidarako, eta horrek Ruben Pardori titular gisa jokatzeko aukera eman zion. Aukera ederki probestu zuen Rincón Del Sotokoak, eta zelai erdian jaun eta gabe izatez gain gol ikusgarria sartu zuen. Zale, kazetari zein entrenatzailearen laudorioak jaso ditu gaztetxoak, baina ez dago argi hasieratik jokatuko duen bihar eguerdian. Harribitxi bat da, eta Montanierrek badaki hori, hala eta guztiz ere, babestu egin nahi du. Etorkizuna berea da, eta entrenatzaileak apurka, progresiboki sartu nahi du taldean. Elustondo eta Demidov min hartuta daudenez, Aranbururen eta Markelen alde egingo du frantziarrak. Illarramendi ere osatu da belauneko lesiotik, eta minutuak izango ditu, nahiz eta partida osoa ez duen jokatuko. Sevillakoa ispilatze bat ez zela erakusteko aukera izango du, hortaz, Pardok.

19 jokalari deitu ditu Montanierrek, Xabi Prieto ondoezik dagoelako aste osoan gaixo egon ondoren. Ansotegi deialdira itzuli da Demidoven ordez. De la Bella ere itzuli da, hilabete luzez min hartuta egon ondoren. Zaila izango du ordea hamaikakora itzultzea, Cadamuro maila onean baitabil. Atzealdea gutxien mugitzen den lerroa izan ohi da, eta behin tekla egokia aurkituta, ez dirudi aldaketa handirik egingo duen Montanierrek. Prieto guztiz ondo ez dagoenez, normalena Vela —eskuinetik—, Griezmann —ezkerretik— eta Agirretxe —erdian— aritzea izango litzateke.

Granada: Goraka, baina itotasunekin

Lehenengo Mailako talde apalenetakoa da Granada. Orain bi urte Bigarren B Mailan egon ondoren, bi aldiz jarraian igo da. Udinese aita ponteko duela, hazkunde handia izan du. Italiako taldeak jokalari asko utzi dizkio, eta, horrek eragin zuen desoreka azken bi urtetan. Baina, Lehengo Maila guztiz desberdina da, eta Granadari kosta egin zaio maila gorenari neurria hartzea. Taldeko izarra, entrenatzailea, bota dute. Pertsona miretsia eta maitea zen Fabri. Horren adierazle dira presidenteak botatako malkoak haren kaleratzearen berri eman zuenean. Ez zuten bota nahi, baina taldearen egoera iraultzeko beharra zuten. Abel Resino atezain ohia fitxatu zuten. Atletico Madrilen eta Valladoliden entrenatzaile izandakoak urtarrilaren 26an hartu zuen kargua.

Resino entrenatzaile denetik, emaitza onak izan ditu Granadak, Betis eta Malaga bezalako taldeei irabazita. Horrek Fabri bota izanaren inguruko zurrumurruak areagotu ditu. Granada aldean diotenez, jokalariek bota zuten Fabri, berarekin gustura ez zeudelako. Hala izan, edo ez, itxura hobeago du orain Granadak. Dena den, 17. daude sailkapenean, jaitsiera postuetatik bi puntura.

Ez du buruhausterik izan Resinok deialdia egiteko. Diakhaté zigortuta dago, baina beste jokalari guztiak jokatzeko moduan daude. Senegaldarra taldeko jokalari onenetakoa da, harresi bat atzean eta buruz abila. Kalte egingo dio bere hutsuneak andaluziarrei. Baina, Dani Benitez osatu da, eta Carlos Martinezek erne ibili beharko du haren abiadurarekin. Defentsa gogorra eta sendoa du Granadak, lege zaharrekoa, baina erdiko atzelariak nahiko motelak dira, eta Realaren kontraerasoarekin sufritu dezakete. Nyom eta Siquiera hegalekoak erasoan asko agertu ohi dira, baina, gero, kaskarrak dira defentsa lanetan. Griezmannek eta Velak min handia egin dezakete hortik. Anoetan, batez ere Kopako partidan, ikusi zen hortik datorrela bidea. Zulo hori bilatu beharko dute jokalariek.

Zelai erdian Aranburu, Pardo eta enparauek ez lukete arazo handiegirik eduki behar Mikel Rico eta Yebda bezalako jokalariekin. Sendoak dira, eta grinatsuak, baina ez dira bereziki onak. Dena den, euskal herritarrak jaurtiketa ona du. Kontu handiagoa eduki beharko dute Martinsekin, abilagoa baita. Portugaldarrak eraman ohi du andaluziarren aginte makila. Erasoan jokalari interesgarriak ditu Granadak, arriskutsuak. Halere, hiru jokalariren artean bost gol besterik ez dituzte sartu. Ighalo nigeriarra da minutu gehien izaten ari den jokalaria, Geijoren eta Ucheren aurretik. Azkarra da Ighalo, baina ez du zorterik erremateekin. Gol gutxi sartu arren, tentuz ibili beharko dute Iñigo Martinezek eta Mikel Gonzalezek, hirukote horretako edonork sar baitezake gola. Aipaturiko gol faltari aurre egiteko Henrique gaztea fitxatu du Granadak. Sao Paulotik ekarri dute, 20 urte besterik ez ditu, baina etorkizun handiko jokalaria da. 20 urte azpiko Munduko Txapelketan, jokalari onena eta golegile nagusia izan zen. Erne, beraz, Henriquerekin. Utzita ekarri dute. Minutuak dituen heinean, zeresana emango du. Hurrengo astetik aurrera, ez bihar.

Deialdia:

Granada: Julio Cesar, Roberto; Siqueira, Nyom, Mainz, Iñigo Lopez, Borja Gomez, David Cortés; Mikel Rico, Fran Rico, Abel Gómez,  Jaime Romero, Franco Jara, Martins; Ighalo, Geijo, Uche eta Henrique.

Reala: Bravo, Zubikarai, Carlos Martinez, Estrada, Ansotegi, Mikel Gonzalez, Iñigo Martinez, Cadamuro, De la Bella; Markel, Illarramendi, Aranburu, Pardo; Xabi Prieto, Griezmann, Vela, Agirretxe, Ifrán eta Llorente.