ZERGATIK EZ?

Ahaztu Elustondoren txartel gorria, ahaztu joko bolada ona, ahaztu 12 puntutik 8 lortu izana. Ahaztu guztia igandera arte. Orain Koparen ordua da. Realak Granadaren aurka jokatuko du gaur 21:00etan. Ogitartekoko partida, eta zergatik ez, ilusioa pizteko norgehiagoka. Halako kanporaketen aurrean bi aukera daude: Kopa gutxietsi eta Ligan buru-belarri jardun, edo ametsei aukera eman eta Kopan aurrera egiten saiatu. Bigarren aukeraren aldekoa dirudi Philippe Montanierrek, eta Ruben Pardo deitu du soilik bigarren taldetik. Claudio Bravo, Carlos Martinez, Iñigo Martinez eta Carlos Vela deialditik kanpo utzi ditu atseden hartzeko. Hitz hauek idazterakoan 19 jokalariko deialdia osatu zuen entrenatzaileak; beraz, oraindik beste jokalari bat geratuko da kanpoan.

Ordezkoek beren aukera izateko erabili ohi da Kopa, eta horiek izango dira gaurko hamaikakoa osatuko duten jokalariak. Aulkira begira, baina, Montanierrek maila hadiko jokalariak zelairatuko dituela antzeman daiteke. De la Bella, Demidov, Pardo, Mariga, Prieto, Llorente eta Ifran bezalako jokalariak hasieratik ariko dira ziurrenik. Ezin da ahaztu horietako batzuk titularrak zirela lehengo urtean, eta lesioak tarte galdu dutela soilik beren postua hamaikakoan. Pardo gaztetxoak ere sekulako aukera du Montanierri etorkizuna ez ezik oraina ere badela erakusteko. Elustondok ere hasieratik joka dezake, Vila-real aurka ordubete bakarrik jokatu zuelako, eta horrez gain, Racingen aurka jokatu gabe geratuko delako –baldin eta batzordeak ez badio bigarren txartel horia kentzen-. Hala eta guztiz ere, jokalari bakarrak du bere postua bermaturik, Montanierrek aditzera eman duenez Eñaut Zubikarai izango da atezaina. Maila handiko taldea beraz, lehiakorra izan behar duena.

Granada gainera ez dabil joko bolada onean. Andaluziarrak 15. dihoaz Ligan, Realaren puntu kopuru berberarekin. Ligan bi partida irabazi gabe dago. Getaferen aurka 1-0 galdu zuen, eta Mallorcarekin bina berdindu zuen, azken minutuak atxe itxiarekin jokatu zen partidan. Aurretik Zaragozari etxean eta Athletici San Mamesen irabazi zioten. Fabrik dozena erdi jokalari ditu min harturik: Pamarot, Lucena, Yebda, Fran Rico, Martins eta Abel Gomez. Hala, defentsa osatzeko arazoekin daude. Roberto atezain titularra deialditik kanpo geratu da, eta Boateng harrobiko jokalaria Donostian izango da. Granadak eta Realak elkar ikusi dute dagoeneko Ligan. 1-0 irabazi zuten txuri-urdinek Estradaren gol ikusgarri bati esker. Partida itxusia izan zen, trabatua, baina Realak Granada baino hobeago dela erakutsi zuen.

Etsigarria da Realak azken urteetan Kopan eman duen itxura. Azken hamar ediziotan bi aldiz soilik egin du aurrera, maiz Bigarren edo Bigarren B mailako taldeen aurka jokatu duen arren. Aurrekari tamalgarriak donostiarrentzat. Final hamaseirenetako langa pasaezina bihurtu da, eta Kopan nolabaiteko madarikazio bat dagoela dirudi. Final zortzirenetan sartzeak ilusioa piztuko luke zaleengan. Zozketan zorte izanez gero final laurdenetara sailkatzea posible delako. Gero, librea da amets egitea. Baina poz iturri izan daitekeena, aldarte onena ere iluntzeko zorigaizto bihurtu da azken urteetan.

Gaurko partidaren ondoren hilaren 21ean, Santo Tomas eguna, jokatuko da itzuleko partida. Eta, zergatik ez? Gabonetako opari polita izan daiteke final zortzirenetan sartzea.