EZIN DENEAN, EZIN DA

2-1 galdu zuen Realak Bartzelonaren aurka. Hala eta guztiz ere, indartuta aterako dira txuri-urdinak Camp Noueko partidatik. Gutxitan ikusten delako Bartzelona denbora galtzen eta ordulariari so azken minutuetan. Orokorrean bi edo hiru goleko errenta izaten du luzapena iristerako. Realak ez zuen partida bereziki ona egin, baina bizirik iritsi zen azken minutuetara, eta hor, Bartzelona estutzeko gai izan zen. Bigarren zatiko gogoarekin eta grinarekin jokatzen badu astebururo, emaitza onak jasoko ditu.

Harrobiko taldeko hiru jokalari jarri zituen Guardiolak hasieratik: Cristian Tello, Jonathan dos Santos eta Isaac Cuenca. Bazirudien Sampedorrekoak ez ziola beldur handirik Realari, eta lesioak eta Kopako asteazkeneko partidua tartean, jokalari batzuei atseden emateko baliatu nahi zuen. Nolanahi ere, kalitatea soberan zuen taldea jarri zuen zelai gainean. Montanierrek ere ezohiko hamaikakoa jarri zuen, eta Markel Bergarak eta Ruben Pardok hasieratik jokatu zuen erdian; eta Ifranek aukera berri bat izan zuen zelairik zailenean.

Bartzelonaren hamaikakoa ikusita, aukeraren bat egon zitekeela pentsatu zuten askok, baina, goizegi hasi zen okertzen partida txuri-urdinentzat. 8. minutuan Tellok aurre hartu zion Carlos Martinezi, Messik zuloa ikusi zuen eta pase neurtua eman zion harrobiko jokalariari. Bravo angelua ixtera atera zen, baina Bartzelonakoa azkarrago iritsi zen eta atean emeki sartu zuen. Ez zen Bartzelonak izandako aukera bakarra. Aurretik txuri-urdinen atezainak sekulako geldiketa egin zion Messi izarrari; eta minutu bat geroago Ifranek izan zuen aukera Bartzelonaren arean, baina Valdesek ondo erantzun zion uruguaitarraren jaurtiketari.

8. minutuan ahitu zen Realaren itxaropena. Markagailuan atzetik ikusita urduri jarri ziren. Baloia behin eta berriz galdu zuten, eta defentsan ongi moldatu arren, ezin izan zuten erasorik eraiki, baloia zelai erdian galtzen zutelako. Aranburuk lan eskerga egin zuen, eta Pardo, lehen aldiz titular Ligan, galdu samar zegoen. Bitartean Markelek nahikoa zuen defentsan jo eta su ibiltzearekin. Txuri-urdinen lehenengo atzelariak Griezmann eta Prieto ziren, eta Ifran oso bakarrik geratu zen Puyolen eta Mascheranoren aurrean. Saiatu, saiatu zen, baina ezin izan zuen arrisku handirik sortu.

Bartzelona erditik eraso egiten saiatu zen, baina behin eta berriz egin zuen topo Realeko jokalariekin. Area ingurura iristen zirenean baloia galtzen zuten, bost segundo geroago berriz ere berreskuratu eta berriro saiatzeko. Ernegatu ere egin ziren momentu batzuetan, horren froga Cescek area kanpotik eginiko jaurtiketa. Gutxitan ikusten da Bartzelona area kanpotik jaurtiketak egiten. Halere, munduko jokalari onenak izaki, azkar ikusi zuten non zegoen Realaren ahultasuna; hegaletan. Cuenca eta, batez ere, Tello gazteek baloia hartu zutenean min handia egin zuten. Cadamurok eta Carlos Martinezek asko sufritu zuten bi horien abiadurarekin. Tellok behin eta berriz hartu zion aurre Lodosakoari. Baina lehenengo zatian ez zuen golik sartu Bartzelonak. Bravok bost bat geldiketa egin zituen lehenengo 45 minutuetan. Batzuk errazagoak, besteak zailagoak; baina guztietan ziurtasun osoz ibili zen txiletarra. Erdiraketa eta pase guztietan ere ausart ibili zen, eta baloira aurkariak baino lehenago iritsi zen.

Bizirik iritsi zen bigarren zatira Reala; baina gidoi bera jarraitu zuen partidak lehendabiziko minutuetan: Bartzelona erasoan, eta Reala oldarraldiei eutsi nahian. Lehen zatian gertatu bezala, partida hasi bezain pronto gola sartzeko aukera izan zuten txuri-urdinek. Oraingoan Griezmann izan zen Valdesen aurrean bakarrik geratu zena, baina atezainak geldiketa ona egin zion. Realaren arrisku guztia frantziarraren oinetatik etorri zen. Ez zuen golik sartu, baina, bere abiadurak estutasun bat baino gehiagotan jarri zuen Bartzelona. Ifran Velagatik ordezkatu zutenean, aurrelari gisa jokatu zuen, balizko kontraerasotan bere abiaduragaz min egiteko. Txorkatilan min hartuta utzi zuen zelaia Uruguaiko aurrelariak.

Messik hiru partida zeramatzan golik sartu gabe, eta bolada txarra eten nahi zuen hedabideek laugarren partida jarraian lau haizeetara hedatu aurretik. Jokaldiak bera bakarrik egiten saiatu zen, baina ez zuen golik sartzen. Bravo ez zenean, Iñigo Martinez zen argentinarra gelditzen zuena. 64. minutuan atezainari iskin egin zion Messik, eta atean atezainik ez zegoenean, Martinezek urrundu zuen baloia. Bost minutu geroago gola sartu zuen Bartzelonak, baina balio gabe utzi zuen epaileak. Dani Alvesengan jo zuen Telloren jaurtiketak, Brasilekoa goleko-marran jokoz kanpo zegoen. Bila eta bila, 72. minutuan aurkitu zuen Messik bere gola. Bravo Alvesen pasearen bila atera zen, baina argentinarra azkarragoa izan zen, eta atezainaren aurrean gurutzatu zuen baloia.

Pozik eta lasai zeuden Bartzelonakoak. Bi goleko errentak nahikoa zirudien arrisku gehiegi egiten ari ez zen aurkari baten aurka. Gol festaren zain zeuden zale asko. Baina, minutu bat geroago Velak izoztuta utzi zituen denak. Griezmannek, zeinek bestela, pase ona eman zion Arsenaleko jokalariari, eta hark, ez zuen huts egin Valdesen aurrean. Ordu erdi geratzen zen partida amaitzeko, eta gauzak ez zeuden hain argi. Llorente eta Agirretxe sartu zituen Montanierrek berdinketaren bila. Minutuak pasa ahala, urduritzen hasi ziren Bartzelonako jokalariak. Ez daude sufritzera ohituak, eta gaizki pasa zuten partida defendatzen amaituta.

Realak ez zuen berebiziko arriskurik eragin, baina, Bartzelonaren zelaian jokatu ziren azken hamar minutuak. Partida amaitu aurretik, Busquetsek min hartuta zelaia utzi behar izan zuen. Carlos Martinezekin talka egin zuen. Bartzelonako jokalaria lurrera bota zen Realekoari baloia kentzeko, eta azkenak, nahi gabe, takoekin belaunean jo zuen. Irudiak ikusgarriak izan ziren, baina ez du ezer larririk. Azken aukera Realarena izan zen, Velaren erdiraketa bat buruz jaurtiki zuen Agirretxek, baina indar gabe iritsi zen Valdesen eskuetara. Azken minutuetan Bartzelona estutu arren, galdu egin zuen Realak azkenean. Ezin denean, ezin da.

Jokalari onenak:

1.- Antoine Griezmann: Realaren erasoko jokaldi guztiak frantziarraren eskutik etorri ziren. Batzuetan berekoiegia izan zen, eta jokaldia bakarrik egiten saiatu zen. Min handia egin zuen bere abiadurarekin. Velaren gola bere pase batetik etorri zen.

2.- Iñigo Martinez: Lan oso ona egin zuen Ondarrutarrak defentsan. Messitik ahalik eta gertuen ibiltzen saiatu zen. Buruz baloi guztiak eraman zituen, eta Bartzelonako jokalarien jaurtiketa asko galarazi zituen azken segundoan oina sartuta. Ikaragarria izan zen Messik Bravori iskin egin ondoren argentinarrari atera zion baloia.

3.- Claudio Bravo: Geldiketa ugari egin zituen txiletarrak. Horma bat izan zen Bartzelonako jokalarien jaurtiketa gehienetan. Ausart atera zen erdiraketa eta pase guztien bila. Agian, bi goletan hain ausart atera izan ez balitz hobeagoa izan zitekeen; edo akaso ez.