SUFRIMENDU ORO UXATZEKO GARAIPENA

Hil ala bizi zetorren Zaragoza Anoetara, baina 90. minutuetan ez zuen salbazioagatik borrokatzeko asmorik duen taldearen itxura eman. Areago, azken sailkatuaren gabezia guztiak erakutsi zituen. Realak oso garaipen erraza lortu zuen. Hiru gol sartu zituen, baina lasai asko sar zintuzketen dozena erdi edo dozena bat. Jaitsiera postuak bederatzi puntura utzi dituzte txuri-urdinek, eta Zaragozaren egin du dagoeneko. Bat gutxiago lehiarako.

Defentsa osatzeko arazoekin etorri zen Zaragoza. Paredesek bosgarren txartel horia ikusi zuen Vila-realen aurka, eta Lanzaro min hartuta zebilen. Azkenean italiarra hamaikakoan jartzea erabaki zuen Manolo Jimenezek, Da Silvarekin batera. Hegaletan Obradovicek eta Alvarezek jokatu zuten. Partida hasi eta berehala argi geratu zen ez zela aragoarren arratsaldea, eta Agirretxe eta Vela gol gosez zeudela. Mexikarra une gozoan dago, eta taldeko onena izan da azken hilabetean. Laugarren minuturako haren pase bikain bat usurbildarrak Robertoren eskura bidali zuen. Gertatzen da maiz, atzelariek jokalari onenak ostiko bidez gelditu edo kikildu egiten dituztela. Seigarren minutuan Lanzarok oso sarrera itsusia egin zion Velari, eta min hartu zuela zirudien. Baina ez zuten mexikarra gelditu, eta ez zen kikildu.  Baloia hartu, eta bihurrikerietan hasi zen.

Hogei minutu iraun zituen Zaragozakoen indarrak. Zurutuzak baloia area barruan lapurtu zuen, bere erdiraketa atezainak aldaratu zuen, eta Agirretxek, bakar-bakarrik sareetara bidali zuen baloia. Bi minutu geroago, zaleak oraindik gola ospatzen ari zirela, Velak, zeinek bestela, bigarren gola sartu zuen, aldaratze kaskar bat baliatu ondoren. Bizi duen giro nahasiarekin, eta bere burua bi gol atzetik ikusita, burumakur geratu ziren Zaragozako jokalariak, eta ez ziren altxa. Zelai erdian presioa eta sortze lana egiten saiatu ziren, baina eraso kamutsak eta defentsa petralak lan guztia baliogabetu zuen. Zonaz zona, askoz gehiago izan zen etxeko taldea.

Gauzak horrela, gozatzeko zegoen partida. Defentsa aurreratua jarri zuen Zaragozak, eta zulo pila bat aurkitu zituzten Velak, Agirretxek eta Prietok. 40. minutuan itxi zuen partida Agirretxek. Zaragozakoen aldartearen adierazle garbia izan zen. De la Bellak —hasieratik jokatu zuen aspaldiko partez— baloi bat borrokatu zuen erasoan, Edu Orioli kendu egin zion arte. Bere erdiraketari begira geratu ziren atzelari guztiak, eta bigarren zutoinean bakar bakarrik agertu zen Agirretxe gola erraz asko sartzeko. 3-0 eta akabo.

Bigarren zatia trebeziak agertzeko eta estatistikak puzteko zegoen. Griezmannek, Markelek eta Llorentek minutuak izan zituzten, eta Illarramendik, Xabi Prietok eta Agirretxek atseden hartu zuten. Azken 45 minutuek norabide bakarra izan zuten, eta aurrelarien hutsegiteek soilik galarazi zuten garaipen handiagoa. Llorentek azken minutuetan oso gertu izan zuen denboraldiko lehenengo gola, baina ez zuen asmatu. Lehenengoan atezainak hankarekin gelditu zuen jaurtiketa, eta, azkenekoak, bakarrik egon arren, ez zuen asmatu. Aurretik Lanzarok bigarren txartel horia ikusi zuen, Amorebietak derbian egindako antzeko jokaldi batean.

Zaragozaren aurkako garaipenarekin, laugarrena jarraian lortu du Realak Anoetan. Bigarren itzuliko partida guztiak irabazi ditu, Sporting lehenik, Sevilla ondoren eta Mallorca gero. Hurrengoa goitik behera datorren Levante izango da. Laugarrenaren ostean, bosgarrena bilatu nahi dute lasaitasuna behin betiko lortzeko. Jaitsiera postuak bederatzi puntura daude, eta Europak gertuago jarraitzen du. Helburua argia da, salbazioa, baina Anoetak gotorleku badirau, ikusi beharko da desirak mugarik duen.

Jokalari onenak:

3.- Vela: Taldeko onena. Azken pase ugari eman, atzealdean zuloak aurkitu, eta bihurrikeriak egin. Gainera, gola sartu zuen, eta gehiago sartzeko aukera izan zuen. Arsenalek utzita dago, baina behin baino gehiagotan esan du hemen geratu nahi duela. Zelaian astebururo hitz egiten du. Orain zuzendarien txanda da Vela txuri-urdinez hurrengo urtean ikusteko.

2.- Agirretxe: Bi gol sartu zituen eta gertu izan zuen hat-tricka. Zortzi gol sartu ditu dagoeneko, eta etorkizunerako aurrelaria dela berretsi du. Partida batzuk zeramatzan golik sartu gabe.

1.- Illarramendi: Bi partida egotzita egon ondoren itzuli zen hamaikakora, eta jaun eta jabe izan zen. Aginte makila hartu zuen eta defentsa lanak zein eraso lanak egin zituen. Ez du partida txarrik jokatzen, zaila dena erraz eginda.