GOGORIK GABE EZINEZKOA DA

Gogo eta behar gehien zituen taldeak irabazi zuen atzoko derbia. Osasunak Europako Ligara sailkatzeko aukerari heldu nahi zion, Realak, berriz, ez zuen ezer jokoan. Partida behar horren isla izan zen lehen minututik. Nafarrak garaipenaren bila atera ziren eta, gipuzkoarrak, begira geratu ziren, epaileak amaiera noiz adieraziko zain.

Grinarik gabe jokatuta, lehiakortasun oro galdu zuen Realak. Philippe Montanierrek denboraldian minutu gutxien jokatu duten jokalariak saritu zituen. Hala, Ansotegik, Demidovek eta Ifranek hasieratik jokatu zuten. Ez zuten bere aukera baliatu. Bi atzelariek titular izateko mailarik ez daukatela erakutsi zuten, errusiar jatorriko norvegiarrak batez ere. Hasierako hamaikakoan egon nahi badu, ezin dira hainbeste erraztasun eman aurkariari. Ifranek ere ez zuen bere aukera baliatu, baina, egiari zor, ez zuen aukera handiegirik izan.

Lehen minututik oinez ibili zen taldea, batez ere zelai erdian. Elustondok, Zurutuzak eta Aranburuk oporretan ziruditen, pasieran Osasunako jokalarien artean. Nafarrak jaun eta jabe ziren zelaierdian, eta Realeko jokalariak uneoro baloiaren atzetik zeuden. Gorritxoek segituan jaso zuten oparia. Jokaldi aldrebes batean huts egin zuten atzelariek, Bravo ere ez zen fin aritu, eta Ibrahimak oparia probestu zuen. 13. minutuan aurretik zen Osasuna.

Etxeko taldeak ez zuen gehiago behar. Markagailuan aurretik, nahi zuen tokian zuen partida, eta gogokoen duen joko mota erabili zuen. Joanekoan, Anoetan, Reala nagusi izan bazen, eta partida irekia planteatu bazuen; erabat desberdina izan zen Sadarrekoa. Gerrilla partida prestatu zuten, jokaldiz jokaldi, zonaz zona jokatzen den horietakoa. Hala, jokaldi guztietan nagusi ziren etxekoak, gogo gehiago jartzen zutelako. Realaren gabeziak inoiz baino garbiago geratu ziren, eta erasoan hainbat jokalarik duten kalitateak soilik erakutsi zuen noizbehinka lehiatu egiten zutela. Vela, Prieto eta Ifran gris ibili ziren, baina baloia oinetan zutenean, zerbait berezia dutela erakutsi zuen.

Realak pare bat aukera izan zituen soilik lehenengo zatian, eta ez ziren oso garbiak izan. Osasunak markagailuari eutsi zion, eta kontraerasoan atera zen. Cejudoren, Ninoren eta Ibrahimaren abiadurak De la Bellaren eta Estradaren gabeziak erakutsi zituen; eta Raul Garciak irrigarri utzi zituen euskarri denak.

Aldageletako itzulera ez bueltatzea bezalakoa izan zen. Hamaika jokalari zelairatu ziren, beren gorputzak hor zeuden, baina bere burua Sadarretik urrun zegoen jada. Gol bakarrarekin berdinketa lor zitekeen, baina txuri-urdinak ez ziren saiatu. Bravo izan zen Realeko jokalari onena, eta txiletarrarengatik ez balitz, bi edo hiru gol gehiago jasoko lukete txuri-urdinek. Montanierrek aulkia mugitu zuen, eta Agirretxe, Llorente eta Griezmann sartu zituen Elustondo, Ifran eta Estradaren partez. Dinamita guztia zelaian zegoen, baina ez zuen inork eraikitzen jokoa. Velak eta Ansotegik aukera garbi bana izan zuten. Mexikarrak 72. minutuan gertu izan zuen gola, baina Andres Fernandezek jaurtiketa gelditu zuen. Atzelari bizkaitarrak gora errematatu zuen korner bat amaieratik gertu.

Atzoko porrotarekin etxetik kanpo irabazi gabe amaitu du bigarren itzulia Realak. Bi urte jarraian daramatza etxetik kanpo bigarren itzulian irabazi gabe. Azken hamar partidetan hamar puntu lortu ditu taldeak eta 44 punturekin dago. Denboraldiko azken partida larunbatean jokatuko da, 20:00etan. Realak eta Valentziak ez dute ezer jokoan. Mikel Aranbururen agurra izango da. Realak hiru puntuko oparia eman beharko lioke Azpeitiko kapitain handiari.

Partidako onenak:

3.- Claudio Bravo: Seinale txarra atezaina taldeko hoberena izatea. Eta, tamalez, ez da denboraldiko lehen aldia izan. Jasotako golean ez zen guztiz fin ibili, baina, beragatik ez balitz, gutxienez beste bi gol jasoko zituen Realak bigarren zatian.

2.- Carlos Vela: Ez zuen bere partida onena jokatu Sadarrerako itzuleran, baina baloia oinetan zuenean arrisku jokaldiak egiten saiatu zen. Zaila izango da, baina Realak fitxatu egin beharko luke.

1.- Xabi Prieto: Velaren kasuan bezala, ez zen bere partida onena izan. Saiatu zen, baina ez zuen lortu. Halere, baloia zuenean, Osasunakoek ez zuten ondo pasa.