SUFRIMENDUAREN ONDOREN, GOZAMENA

Sinplea da futbola batzuetan. Tiki-takaren aroan sei jokalari aurkarien arean jarri eta baloiak etengabe erdiratzea aski da bost minututan bi gol sartzeko. Carlos Velak lehendabizi, eta Diego Ifranek geroago eromena piztu zuten Anoetako harmailetan. Bigarren garaipena jarraian, zazpi puntu hiru partidatan eta hiru gol azken minutuetan. Philippe Montanierrek beste astebetez jarraituko du bere postuan, eta giroa lasaiagoa izango da orain.

Malaga mendean hartzeko asmoarekin zelairatu zen Reala. Denboraldian lehendabiziz hamaikakoa errepikatu zuen Montanierrek. Harrobiko bederatzi jokalari atera zituen hasieratik. Aurrean Abdullah Al-Thaniren Malaga zuten txuri-urdinek. Cazorla, Toulalan eta Isco bezalako fitxaketekin, paperean aurkari zaila eta arriskutsua zirudien. Baina Reala jokalariak ez ziren kikildu eta zelai erdian nagusitasuna izateko asmoarekin hasi zuten partida. Pase motzak, jokoa hegaletara ireki... ondo hasi ziren. Bazirudien aurredenboraldian saldu ziguten jogo bonito-a ikusiko genuela. Elustondo baloia eskatzera jaisten zen defentsengana, eta Aranbururekin batera egindako lanari esker Zurutuzak askatasun handiarekin jokatu ahal zuen.

Joko onak etekina izan zuen. Estradak ezker hankarekin erdiraketa bikaina egin zuen hegaletik, Agirretxek buruz ondo eman zion, eta langari eman osteak Demichellisek bere atean sartu zuen baloia. Hamargarren minuturako Reala aurretik zegoen oso partida serioa eginda. Malaga Iscoren bitartez hasi zen mina egiten. Andaluziarren jokalari nabarmenetarikoa izan zen gaztetxoa. Pixkanaka Toulalan zelaierdia menderatzen hasi zen, eta arriskua eragiten hasi zen Malaga. Falta batean etorri zen gola, hogeigarren minutuan. Falta azkar atera zuten, baloia Iscok hartu zuen area barnean eta bere erdiraketa Rondonek burukatu zuen Bravoren, Carlos Martinezen eta Agirretxeren artean. Hamar minutu baino ez zuen iraun txuri-urdinen pozak. Hortik atsedenaldira intentsitatez beteriko partida ikusi zen. Malagak Toulalanen, Iscoren eta Cazorlaren artean min handia egin zuen. Realak ere bere aukerak izan zituen. Agirretxek ezin izan zuen sarretara bidali Carlos Martinezen erdiraketa. Vela eta Griezmann hegaletatik min egiten saiatu ziren, baina beren saiakerak kamutsak izan ziren. Aldageletara joan aurretik Zurutuzak izan zuen aukera onena, baina Caballerok bere jaurtiketa lehorra kornerrera urrundu zuen.

Bigarren zatian bi pauso atzera eman zituen Realak. Malaga bultzaka hasi zen Iscoren eta Toulalanen bidez beste behin ere. Lorenek orain dela aste batzuk esan zuen jokalarien huts puntual batzuk zigortu dutela Reala. Eta atzokoan hori gertatuko zela zirudien. Arrisku handirik ez zuen jokaldi batean Mikel Gonzalezek ez zuen urruntzen asmatu, eta Sebas Fernandezek Bravoren hankapetik sartu zuen gola. Huts handia egin zuen arrasatearrak. Malagaren aurrelaria zetorrela ikusi zuen, baina baloia urrundu beharrean jokatzea erabaki zuen. Jokalariak burumakur geratu ziren. Ukabilkada gogorra izan zen gola. Hortik aurrera Toulalanek zelaierdiko nagusitasuna hartu zen. Elustondo alde batetik bestera ibili zen defentsa lanetan biderkatuta eta erasoak hasten zaiatzen. Baina partida Malagak nahi zuen tokian zegoen, eta baloiaren jabetzarekin denbora pasatzen utzi zuen.

Harmailetan urduritasuna nagusitu zen, usai txarra zuen partidak eta zaleak palkora eta aulkira begira jarri ziren. Hamabost minutu besterik ez ziren falta partida amaitzeko, baina Montanierrek ez zuen aldaketarik egiten. Baina epikara kondenatua dago talde hau. Bost minututan Ifran aurrena eta Llorente geroago atera zituen. Karta guztiak mahai gainean jarri eta metxa pizten saiatu zen frantziarra. Pase motzak eta abar ahaztu zituen, eta antzinako futbola berreskuratuta baloiak area barrura sartzen hasi zen Reala. Lan horretan Pardo gaztetxoa jarri zuen Montanierrek. 85. minutuan partida erabat hautsia zegoen. Pardo ia defentsa laneta, eta Iñigo Martinez, Griezmann, Vela, Agirretxe, Ifran eta Llorente golak sartzen saiatzen. Halako batean, erdiraketa horietako baten eraginez, jokaldi nahasi bat hasi, Mikel Gonzalezek Malagako jokalari bat oztopatu zuen, Velak buruarekin baloia kokatu eta txilena ikaragarri batekin baloia sareetara bidali zuen. Caballerok eskuak burura eraman zituen, ezin sinetsita. Eromena nagusitu zen harmailetan, denak saltoka eta buiaka.

Mexikarrak metxa piztu zuen, baina eztanda falta zen oraindik. Harmaila bultzaka hasi zen, zaleentzat berdinketa ez zen nahikoa eta jokalariek ere gehiago nahi zuten. Beste erdiraketa batean Agirretxeri iritsi zitzaion baloia area kanpoaldean. Baloia erdiratu eta Ifranek hartu zuen; iskin egin, keinua egin eta goxo-goxo sartu zuen gola. Azkenean, eztanda. Luzapenean zegoen partida, eta Realak markagailua irauli zuen. Montanierren burua Ifranek salbatu zuen, entrenatzailearekin liskar gehien izan dituen jokalariak. Hiru minutu falta ziren, baina hiru ordu zirela iruditu zitzaien zaleei. Malagak azken aukera bat izan zuen, baina Bravo oso seguru ibili zen. Hamahirugarren dago orain Reala, jaitsiera postuetatik hiru puntura. Bigarren partida jarraian irabazi dute txuri-urdinek, itxura ona ematen. Montanier ere lasaiago dago, azkenik egindako aldagelekin asmatu egin baitu. Hordagoa bota eta irabazi.