ZAILA BADA, EZ DA EZINEZKOA

Futbolaren historian egon den talderik onenaren aurka jokatuko du Realak, hemendik 50 urtera tabernetako tertulietan gogoratuko den talde baten aurka: “Pep Guardiolaren Bartzelona hura”. Erronka zaila zinez txuri-urdinentzat, Camp Nouetik punturen bat lortzea ia ezinezkoa delako. Estatistikak eta jokoa, dena dute aurka donostiarrek, baina itxaropenaren iltze goriari heldu behar diote, epaileak amaiera adierazi arte 11 jokalari 11ren aurka jokatuko baitute (22:00, LaSexta). Zaila, bai; baina ez ezinezkoa.

Presiorik gabe zelairatuko da Reala. Porrota aurreikuspen gehienetan sartzen dela jakitun. Dena den, presio eza hori zelaian era egokian islatzen jakin behar dute. Lehengo urtean bezala jokatuz gero, Donostiara 5-0 huts galduta itzuliko dira. Iaz, 32. minuturako 2-0 galtzen ari zen taldea, eta ia ez zuen faltarik egin; bederatzi soilik. Hanka sartzeko beldurrez 11 jokalariak area barruan zeuden ia-ia, eta Messi eta enparauek hankapean ibili zituzten. Baloiaren jabetzaren %78a izan zuten kataluniarrek

Horregatik, kosk egitera atera behar du taldeak aurten, Bartzelonaren zelai erdia ahalik eta gehien itotzera. Asko hitz egin da aste honetan Ruben Pardo gazteak Nou Campen egin dezakeen ekarpenaz; baina askoz garrantzitsuagoa izango da Markel Bergarak defentsa lanetan egin dezakeen lana. Realaren aukera urriak Elgoibarkoak zelai erdiko defentsa lanetan egin beharreko lanean egongo dira. Cesc eta besteak eroso badaude, akabo. Erasoko jokalariek aukera gutxi izango dituzte, eta gutxi horietan Victor Valdesen atea zulatzen asmatu beharko dute. Bi gol bakarrik jaso ditu Bartzelonak Ligan denboraldi honetan; biak Betisen aurkako partidan — 4-2 irabazi zuten kataluniarrek—. Ez du partidarik galdu Camp Noun.

Neguko merkatuan bi jokalari joan dira: McDonald Mariga eta Jeffrey Sarpong. Lehen taldean jokalari gutxi daude orain, eta gaur bezala, lesio bat baino gehiago elkartzen direnean; harrobiko jokalariak sartu beharko ditu deialdian Philippe Montanierrek. 19 jokalariko deialdia egin du, eta Ruben Pardo eta Javi Ros deitu ditu; baita min hartuta egon diren Imanol Agirretxe eta Vadim Demidov. Ziurrenik bi hauetako bat utziko du kanpoan. Xabi Prietok ere mina izan du txorkatilan baina guztiz sendotu da, eta jokatzeko moduan dago. Hamaikakoko aldaketa nagusia zelai erdian egongo da. David Zurutuza eta Gorka Elustondo min hartuta daude; eta, ziurrenik Pardo gazteak, Aranburuk eta Bergarak jokatuko dute. Aurrelari gisa Diego Ifranek ditu aukera gehien, hegaletan Antoine Griezmann eta Carlos Vela edo Xabi Prieto dituela.

Bartzelona ‘krisian’ eta harrobiko hiru jokalarirekin

Real Madril zazpi puntura du Bartzelonak, eta Liga irabaztea inoiz baino zailago dauka Guardiolaren taldeak. Horrez gain krisian omen dago Bartzelona, azken hiru partidak berdindu dituelako. Lehenik eta behin bina berdindu zuen Real Madrilen aurka, eta aurkari zitalena Kopatik kanporatu zuen, gero Vila-realen aurka 0-0 berdindu zuen Ligan, eta Kopan berriro 1-1 egin zuen Valentziaren aurka finalerdietako joanekoan. Horri deitzen diote krisia.

Montanierrek bezala, Guardiolak jokalari gutxi ditu lehen taldean, eta Villaren, Afellayen, Fontasen, Pedroren eta Iniestaren lesioak direla eta harrobiko hiru jokalari deitu ditu: Sergi Roberto, Dos Santos eta Tello. Zelai erdian baloia maisuki mugitzen dute lehen biek. Bartzelona genea daukate, batez ere Robertok, eta pare bat urte barru Xavi eta Iniestaren ordezkoak izango dira. Jonathan Dos Santos, Giovanni Dos Santos Bartzelonako eta Racingeko jokalari ohiaren anaia da. Tello hegaleko jokalari azkarra eta arriskutsua da. Baloia hanketan duenean hegaleko atzelariei iskin egin eta erdiraketak jartzen iaioa da.

Hamaika lesio izan arren, egundoko hamaikakoa egin dezake Guardiolak: Valdes atepean; Alves, Puyol, Pique eta Abidal atzean; Thiagok, Xavik eta Busquetsek osatutako zelai erdia; eta Messi, Cesc eta Alexis defentsa txikitzeko. Txiletarra min hartuta ibili da eta ez da guztiz osatu. Nolanahi ere, hasieratik izango da, Bartzelonak bere beharra duelako. Asko harritu egin ziren Bartzelonak Alexisengatik 40 milioi euro ordaindu zituenean; Espainian nahiko jokalari ezezaguna zelako. Halere, 40 milioi balio dituela erakutsi du, eta ekarpen handia egin dio taldeari.

Realak Camp Nouen Ligan jokatutako azken hamazazpi partidetan galdu du. Hiru aldiz irabazi du soilik; azkena 1991ean — 1-3 —. Horrez gain, azken gola 2002-2003 denboraldian sartu zuten txuri-urdinek. Bada beste arrazoi bat Realaren aurka egiten duena. Real Madrilek Getaferen aurka jokatuko du gaur 20:00etan, Camp Noueko partidaren aurretik. Jose Mourinhoren taldeak irabaziz gero, presioa sartuko dio Bartzelonari, irabaztera behartuko baititu. Real Madrilek galduz gero, lau puntura hurbiltzen saiatuko dira kataluniarrak. Bata edo beste gertatu, Realak ordaindu dezake Vila-realen aurkako berdinketa hura. Baina, tira, estatistikak hautsi egiten dira noizean behin.

Urtz taldeak Ez gaitu inork geldituko abestian kantatzen zuen moduan, “Nork esan du ezinezkoa da? Nork onartu hori hala dela? Zaila bada, ez da ezinezkoa; zaila bada, badago lortzea”.

Deialdia:

Bartzelona: Victor Valdes, Jose Manuel Pinto; Dani Alves, Carles Puyol, Gerard Pique, Eric Abidal, Adriano Correia; Javier Mascherano, Xavi Hernandez, Sergio Busquets, Cesc Fabregas, Thiago Alcantara, Sergi Roberto, Jonathan Dos Santos; Lionel Messi, Alexis Sanchez, Isaac Cuenca eta Cristian Tello

Reala: Claudio Bravo, Toño Ramirez; Carlos Martinez, Dani Estrada, Iñigo Martinez, Mikel Gonzalez, Vadim Demidov, Ion Ansotegi, Liassine Cadamuro; Mikel Aranburu, Markel Bergara, Ruben Pardo, Javi Ros; Xabi Prieto, Carlos Vela, Antoine Griezmann, Diego Ifran, Imanol Agirretxe eta Joseba Llorente