EUROPA ZELAI GAINERA

Europa. Ez da beste hitzik egon Realaren inguruan aste osoan. Hitz eta pitz Europako postuen gertutasunaz eta balizko sailkatzeaz. Berriketa luzeak eta bi mezu nagusi: hurrengo urtean Europan jokatzeko maila dauka egungo multzoak, baina pixkanaka joan behar da, gehiegizko euforia baztertuta. Bi ideia kontrajarri horiek talka egin dute. Desira, batetik; zuhurtzia, bestetik. Bidea egiteke dago, eta gaurko partidak zehaztuko du zenbateraino hitz egin daiteke Europaz. Txuri-urdinek Getafe hartuko dute Anoetan (16:00; C+L, GolT), bi puntu gainetik dagoen taldea. Europako atea Anoetan ireki behar du Realak.

Azkenaldian, aurrera pausoa emateko aukera izan duen bakoitzean tupust egin dute txuri-urdinek. Eta, alderantziz; itolarrian ziren unetan arnasa hartu eta burua altxa. Azken egoera horretatik etorri dira azken bi garaipenak: Malagaren aurka inoiz baino kolokago zegoen Montanier; Valentziaren aurka, Kopako estropezua ahaztu behar zen. Bi plaza zail hasiera batean. Emaitza? Maila handiko bi garaipen; azkenekoa, batez ere, valentziarrei bost gol sartu ondoren. Bolada onean murgildu da Reala, azken hamabi puntutik hamar lortuta. Eta ez emaitzei dagokionean soilik, jokoz ere une gozoan daude txuri-urdinak. Montanierrek Pardo eta Illarramendi batera jartzea erabaki zuenetik, asko hazi da taldearen jokoa. Horrez gain, erasoko jokalariak golak sartzen hasi dira azkenean. Sailkapeneko lau lehenek soilik sartu dute Realak baina gol gehiago.

Aspaldiko partez zelai erdia menderatzen dute gipuzkoarrek ia partida guztiak. Baloiaren jabetzarekin eroso sentitzen dira jokalariak, eta erasoan ongi ukitzen dute; azkar, hutsuneak bilatu eta baliatuz. Hainbat jokalari min hartuta ibili dira, eta horrek aldaketak egitera behartu du entrenatzailea. Hala eta guztiz ere, ez da sumatu jokalari gehienen falta. Aurreko jardunaldira arte partida guztiak hasieratik jokatu zituen Illarramendik. Osasunaren aurka bosgarren txartel horia ikusita, atseden hartu zuen Valentzian. Zurutuzak metro batzuk atzerago jokatu zuen, eta ederto moldatu zen.

Mutrikuarra hamaikakora itzuliko da gaur, eta Zurutuzak ohi duen lekuan jokatuko du, punta erdi lanetako hiruko lerroan. Horrek Prieto eskuin hegalera mugituko du, Velaren lekua hartuz. Mexikarrak Valentzian ikusi zuen bosgarren txartel horia. Taldearen motorra izan da azken partidetan, baina beste jokalari batek hartu beharko du erantzukizuna Getaferen aurka. Ezker hegalean Griezmannek jokatuko du hasieratik ziurrenik, baina baliteke Chory Castrok ordezkatzea. Inoiz baino hobeto hasi zuen denboraldia frantziarrak, taldekideek baino puntu bat gorago. Baina min hartu zuenetik ez dabil guztiz fin. Uruguaiarra, berriz, aukera gehiago eskatzen ari da. Jokatzen duen bakoitzean oso maila ona ematen ari da. Batek ala besteak jokatu, maila handiko jokalari bat ariko da ezker hegaletik.

Aste osoan min hartuta ibili den arren, seguruenik Ifran ariko da aurrelari gisa. Montanierrek zalantza bat baino gehiago izan du uruguaiarrarekin Realera iritsi zenetik. Lehenik hegalean jarri nahi zuen, eta aurrelaria ez zuen gustuko han jokatzea. Eztabaida bat baino gehiago eduki zuen eta ostrazismora kondenatu zuen entrenatzaileak. Bide berea hartu zuen aurten eta neguan talderen batera utzita joango zela zirudien. Baina, minutuak eskaini eta ongi baino hobeto baliatu ditu Ifranek. Gogor aritu da presioan, bizi desmarkeetan, eta ez da batere berekoia izan. Aurreko jardunaldian, gainera, lehenengo gola sartzea lortu zuen. Aurre hartu dio Agirretxeri, nahiz eta usurbildarrak ere gola sartu Valentzian.

Baina Europarekin amets egiten jarraitzeko, Getaferi irabazi behar diote txuri-urdinek lehenik. Seigarren daude madrildarrak, Luis Garciaren gidaritzapean Lehen Mailan inoiz egin duten hasiera onena egin ondoren. Zazpi partida irabazi dituzte eta bakarra berdindu: 22 puntu. Realak bezala, zelai erditik gora kalitate handiko jokalariak dituzte. Iaz nahiko denboraldi grisa eduki ondoren, Pedro Leon bere mailara itzuli da. Ezker hegalean Lafitak edo Gavilanek joka dezakete —Diego Castrok ezin du jokatu, zigortuta baitago—, eta punta erdi lanetan Barrada egongo da. Marokoar jatorriko frantziarra Getaferen jokalari onenetakoa da. 22 urte besterik ez ditu, eta iaz aritu zen lehen aldiz nagusiekin, baina segituan hartu zuen lekua hamaikakoan. Jokalari abila, kalitate handikoa eta jaurtiketa bortitzekoa da. Talde garrantzitsuen agendan dago jada.

Miku saldu eta Guizarekin pazientzia galdu ostean, erasoan hutsune handia zuen denboraldi hasieran Getafek. Alvaro Vazquez eta Paco Alcacer fitxatuta, hutsune hori ederki bete du. Guizak alde egin du eta Malaysian jokatzen ari da gaur egun.

Realarekin erasoan dituen antzekotasunak zelai erdian desagertzen dira. Bi taldeen euskarriak oso bestelakoak dira. Pardo eta Illarramendi baloia oinetan dutenean nabarmentzen diren bitartean, lan iluna egiten maisuak dira Lacen eta Xavi Torres. Alavasen jokalari ohia ez da makala baloia jokatuta ateratzen. Atzealde sendoa du Getafek. Lopo eta Alexis maila handiko atzelariak dira, eta arrisku handia dute korner eta faltetan, buruz abilak baitira. Kontuz ibili beharko dute txuri-urdinek halako jokaldietan. Bestetik, ez dira oso azkarrak, eta hori baliatu beharko dute Ifranek, Griezmannek eta Choryk. Hegaletan izen handiegirik izan ez arren maila txukuna ematen duten bi jokalari daude: Valera eta Mane. Atzealde sendoa izan arren, ez dabil guztiz ondo eta gehiegi sumatzen ari da Cata Diaz kapitainaren falta. Azkenik, Moya atezaina onena eta txarrena egiteko gai da.

Getafek beste aurkarien distira ez duen arren, arerio gogorra izango da, zaila. Madrildarrentzat berdinketa ez da emaitza txarra, baina txuri-urdinentzat bai. Behin baino gehiagotan errepikatu den esaldia izan arren, ez du indarrik galdu: aurrera pausoa emateko ordua du Realak; Europara sailkatzeko lehian benetan egon nahi badu, bere hautagaitza aurkeztu behar du. Donostiak ez du 2016ra itxaron nahi europar hiriburua izateko.

Deialdiak:

Reala: Bravo, Zubikarai; Carlos Martinez, Estrada, Mikel Gonzalez, Iñigo Martinez, Ansotegi, De la Bella, Jose Angel; Illarramendi, Zurutuza, Pardo, Ros; Xabi Prieto, Chory Castro, Griezmann, Ifran eta Agirretxe

Getafe: Moya, Codina; Alexis, Mane, Miguel Torres, Lopo, Abraham, Valera; Lacen, Gavilan, Pedro Leon, Lafita, Barrada, Michel, Juan Rodriguez, Xavi Torres; Alvaro eta Alcacer.