GOTORLEKURAKO LEHEN HARRIA

Amaitu da Ligako lehen itzulia, eta Realaren ibilbidea ez doa uste bezain ondo. Orain bi aste zale batzuk Europa postuetara so bazeuden, Atletico Madrilen aurkako porrotak oinak lurrean jarri dizkie. Jaitsiera postuak hurbil daude. Gertuegi. Zerbaitek huts egin du Anoetan bi partida bakarrik irabazi badira. Gotorleku izan ohi zen Anoeta Realarentzat, baina gazteluaren hormak erraztasun handiegiarekin eraitsi dituzte arerioek aurtengo denboraldian. Anoeta gotorleku bihurtzeko lehen pausoa eman behar dute jokalariek Sportingen aurka (16:00, C+L2, PPV). Aurkari zuzena dira asturiarrak, hiru puntu gutxiago dituzte eta azkenaurreko postuan daude.

Noraezean ibili da Reala momentu askotan, norabide egokia jarraitu ezinik; partida onak txarrekin maizegi tartekatuta. Zazpi partida jarraian galdu gabe, bai; baina, berdinketa askorekin eta Mallorcaren eta Atletico Madrilen aurkako hondamendiekin nahastuta. Bigunegiak izan dira txuri-urdinak momentu askotan, eta garestiegi ordaindu du taldeak. Amorratuta daude jokalariak, haserre Atletico Madrilen aurka emandako itxuragatik, eta minduta ulergarri izan ziren txistuekin. Hala, garaipen gosez atera beharko lukete zelaira. Aste osoko mezua garbia izan da: “Sportingi irabazi behar diogu”. Anoetan hirugarren garaipena lortu nahi du Realak. Sportingek 18 urte daramatza Donostian irabazi gabe, beraz aurkari egokia izan daiteke.

Horretarako, ia jokalari guztiak ditu prest Montanierrek. Illarramendi sendotze bidean da. De la Bella eta Demidov deialditik kanpo geratu dira kolpe desberdinak dituztelako. Marigaren lekua Pardo gaztetxoak hartu du. Errioxarra minutu gosez da. Goran, Ifran eta Llorente, biak sartu ditu deialdian Montanierrek, Agirretxe era Velarekin. Hala eta guztiz ere, 19 jokalariko deialdia egin du, eta ziurrenik hiru jokalari horietako batek harmailetatik ikusiko du partida. Ez da ezusteko handirik espero Montanierren hamaikakoan. Iñigo Martinezek Demidoven lekua hartuko du; eta baliteke Estrada ezker hegalera itzultzea, Carlos Martinez guztiz osaturik dagoelako. Zelai erdian azken hilabeteko hirukoteak jarraituko du: Aranburu-Elustondo-Zurutuza. Erasoan Velak, Agirretxek eta Griezmannek ukiezinak dirudite, baina Prietok ere hasieratik joka dezake

Sporting, jaitsiera postuetan

Sporting Reala baino egoera txarragoan iritsiko da Anoetara. Sailkapenagatik ia itota dago Xixongo taldea, eta oso joko kaskarra egiten ari da. Donostiako taldeak baino hiru puntu gutxiago ditu, eta bi partida daramatza irabazi gabe, Zaragozaren aurka berdindu eta Vila-realen aurka galdu ostean. Barral aurrelariak ez du Donostiara bidaiatu, zigortuta baitago bost txartel hori ikusi ondoren. Bere tokia Bilicek hartuko du ziurrenik. Zorigaiztoko aurrelaria da kroaziarra Realeko zaleen oroitzapenean. Bigarren mailako lehen urtean hark jokoz kanpo sartutako gol batek garaipena eman zion Sportingi Molinonen.

Joanekoan 1-2 irabazi ondoren, beste garaipen bat nahi du Montanierrek. Sportingo zaleak oso haserre daude taldearen jokoarekin, baina, halere, nahiko zale egongo dira bihar Anoetako harmailetan. Juan Muñiz gaztea 23 jokalariko deialdian sartu du Preciado entrenatzaileak. Mareoko harrobiko azken harribitxia omen da Muñiz, eta gertutik jarraitu beharko du Realaren zelai erdiak. Casesekin eta De las Cuevasekin batera kalitatea daukate. Aurreko denboraldian ez bezala, arazo ugari izaten ari da aurten Sporting atzealdean. Botia, eta, batez ere Lora, oso maila baxuan ari dira. Zaragozarekin batera gol gehien jaso duen taldea dira: 33.

Zirt edo zart egiteko ordua iritsi da.

Deialdiak:

Reala: Bravo, Toño; Carlos Martinez, Estrada, Ansotegi, Mikel Gonzalez, Iñigo Martinez, Cadamuro; Prieto, Markel, Elustondo, Zurutuza, Pardo, Aranburu Griezmann; Vela, Agirretxe, Ifran eta Llorente

Sporting: Juan Pablo, Dennis; Botia, Lora, Gregory, Ivan Hernández, Canella, Sergio Alvarez, Damián, Galvez; Andre Castro, Rivera, Carmelo, Ayoze, Eguren, De las Cuevas, Nacho Cases, Ricardo Leon, Juan Muñiz; Bilic, Nacho Novo, Sangoy eta Trejo