“Puntu bat ona da, baina gehiago espero nuen
nire taldearengandik”. Esaldi horrekin laburbildu zuen Philippe Montanierrek
Granadaren aurkako partida. Golik gabe berdindu zuten bi taldeek, partida txar
eta aspergarri batean. Realak. Lehenengo hamar sailkatuen artean amaituko dute
txuri-urdinek, eta sei jardunaldi lotu dituzte partidarik galdu gabe. Etxetik
kanpo ere, besteetan ez bezala, bolada ona du. Anoetatik urrun jokatutako azken
lau partidetatik, bi irabazi eta bi berdindu ditu —8 puntu 12 posibletik—.
Baina kezkatzeko arrazoien bat ere ematen du
Realak. Jauzia eman behar duen bakoitzean ez du jauzirik ematen. Norgehiagoka
osoan Granada baino gehiago izan zen arren, ez zen nagusitasun hori
markagailuan islatzeko gai izan. Ez zuen inprobisaziorako gaitasunik erakutsi,
eta ez zuen golik sartzeko abagune garbirik eduki. Granadak bidea itxi zionean,
erdiraketa antzuak egitearekin itsutu zen. Ifran, Griezmann eta enparauekin
hori egitea ideia okerra zen, eta Granadako atzelariak eroso aritu ziren
horrelako jokaldietan.
Zelai erdian Illarramendi eta Zurutuza jaun
eta jabe izan ziren, eta Realeko atzelariek, oro har, ez zuten sufritu. Baina
baloia aurkariaren area inguruan edukitzea ez da aski, gola bilatu behar da.
Hor egin zuten huts donostiarrek. Ez da sasoi honetan halako zerbait gertatzen
den lehen aldia. Jokatzen uzten dioten taldeen aurka eroso daude txuri-urdinak.
Horren erakusle Malaga, Valentzia edo Rayoren aurka egindako erakustaldiak.
Baina aurkaria itxi egiten denean, sufritu egiten du Realak. Ez du bidea
irekitzen asmatzen, eta horma beraren kontra jotzen da behin eta berriz. Hala
gertatu zen Getafe eta Osasunaren aurka; eta berdin-berdina Granadaren aurka.
Dena den, ontzat eman behar da puntua;
gazi-gozoa izan arren. Gorakako bilakaera hartu du taldeak, eta urrats txikiak
egiten bada ere, ari da urratsak egiten. Orain dela ez asko etxetik kanpo
jokatutako partida guztiak galtzen zituen. Granada, etxeko taldea, kinka
larrian iritsi zen partidara. Maila kaskarra ematen ari da, eta sufritu beharko
du denboraldi amaieran jaitsiera postuetatik kanpo egoteko. Anquela
entrenatzailearen dimisioa eskatzen ari dira zale gehienak, norabide aldaketa
baten bila. Egoera horretaz jakitun, grinatsu hasi ziren andaluziarrak,
garaipenaren bila. Ezustean harrapatu zuen hasiera horrek Reala. Ezker
hegaletik mina egiten hasi ziren Siqueira eta Dani Benitez, baina Bravo erne
ibili zen. Lehen hamar minutuetako oldarraldia eutsita, bere kalitatea
erakusten hasi zen Reala.
Hamabigarren minutuan izan zuen lehen
aukera, Xabi Prietoren oinetan. Apurka, Illarramendi eta Zurutuza zelai erdian
nagusitzen hasi zirenean, sufritzen hasi zen Granada. Aurreko jardunaldian
jokatu gabe egon ondoren, protagonismoa nahi zuen Velak. Berak egin zituen
jokaldi arriskutsuenak, eta Siquieraren bizkarra bilatu zuen behin eta berriz.
20. minutuan Mainzekin bultzaka ibili ondoren area barnean erori zen mexikarra.
Bultzakada txikia izan zen eta epaileak ez zuen ezer adierazi. Penaltia
adierazi izan balu ez zen ezer gertatuko. Minutuak pasa ahala, partida
astuntzen joan zen. 22:00etan jokatu izan balitz, batek baino gehiagok lo
hartuko zukeen. Beste bi aukera izan zituzten txuri-urdinek, baina Roberto ondo
ibili zen. 35. minutuan, Velaren erdiraketa buruz errematatu zuen Ifranek,
baina atezainaren eskuetara joan zen. Hamar bat minutu geroago, uruguaiarrak
eman zion pasea mexikarrari, baina indarrik gabe jaurtiki zuen.
Bigarren zatia ez zen lehenengoa baino
hobeago izan. Antzekoa izan zen. Realak baloi jabetza zuen, baina ez zion minik
egiten. Montanierrek normalean baino azkarrago mugitu zuen aulkia, baina
etekinik egin gabe. Espero zitekeen aldaketak egin zituen, gehienek egingo
zituztenak. Azkenaldian oso gris dabilen Griezmannen ordez Chory Castro sartu
zuen. Frantziarren maila txarraren adierazle garbia da bigarren zatian izandako
aukera batean egin zuena. Bakar-bakarrik joan zen ezker hegaletik, baina
erdiraketa penagarria egin zuen gero, aukera galduta. Castrok, dena den, ez
zuen ezer egin jokatutako ordu erdian.
Zurutuza kendu eta Pardo sartu zuen ere.
Taldeko erdilari onenetakoa den arren, atsedena eman zion errioxarrari. Egiari
zor, ez zen bere falta gehiegi sumatu, Illarramendi eta Zurutuza oso ondo ibili
baitziren. Dena den, Pardoren joko ikusmena eta pase luzeak nahi zituen
Montanierrek. Bere kalitatea erakutsi zuen Ifrani egindako erdiraketa bikain
batean. Epaileak jokoz kanpo adierazi zuen, baina errepikapenean huts egin
zuela ikusi zen. Uruguaiarrak gola sartu zuen jokaldi horretan, baina Robertok
ez zen jaurtiketa gelditzen saiatu.
Baina, aspaldiko gaitzak guztiz galdu gabe
ditu Realak. Partida berdinketa aspergarri baino lasai batekin amaituko zela
zirudienean, sufritu egin zuten txuri-urdinek. Eskerrak aurrean Granada zegoen!
Zerbaitengatik dira andaluziarrak gol gutxien sartu duten taldea —11 gol
hamasei partidatan—. Norgehiagoka amaitu aurretik, Bravoren aurrean bakarrik
geratu zen El-Arabi, baina atezainaren gorputzera bidali zuen. Azkeneko
jokaldian, falta eskatu zuten area ertzean, Illarramendik eskuarekin eman
ziolako baloiari, baina epaileak ez zuen ezer adierazi.
Hala, partida hasi bezala amaitu zen, golik
gabe. Urrats txikia, baina ostegunean Sevillaren aurka irabaziz gero, ona.
Txarto dabiltza andaluziarrak, Realak baino hiru puntu gutxiagorekin, Europatik
urrun. Michelen jokalariak ez daude horrelakoetara ohituta. Atzo ere
belarrondoko galanta jaso zuten, derbian Malagaren aurka 0-2 galduta. Gainera,
Fazio, Rakitic eta Perotti ez dira Anoetan izango. Lehenak txartel gorria ikusi
zuen penaltia egin ondoren, eta beste biek min hartu zuten. Hala,
entrenatzailea kinka larrian dago, eta Realaren aurka galduz gero, kargua utz
dezake.
No hay comentarios:
Publicar un comentario