Hiru puntuen errezeta prestatu zuen atzo Realak.
Partida labean sartu aurretik, txukun-txukun jarraitu zituzten txuri-urdinek
pausoak. Osagai guztiak bota zituzten: derby baten gatza eta piperra, ura
goitik behetik euria zela eta, orea ere ondo nahastu zuten zelai erdia
menderatuz eta erasoan jokaldiak ondo egituratuta. Labean suabe-suabe sartu
zuten, 90 minutu ondoren zale guztiek hiru puntu dastatu zezaten. Baina ordu
eta erdi pasa zenean, labea ireki eta horrek ez zuen esperotako itxura izan.
Azken osagaia falta zitzaion Realari, futbolari gozotasuna ematen diona: gola.
Eta golik gabe ez daude hiru puntu.
Realak derbya ez irabazteko errudun nagusia Andres
Fernandez Osasunako atezaina izan zen. Realaren eraso guzti guztiak geratu zituen,
eta ez zuen aukerarik eman. Txuri-urdinek joko bolada onari eutsi zioten, eta
azken asteetako partidak ilusioa baino errealitatea direla erakutsi zuten.
Ilusioa ematen du txuri-urdinek zein maila onean joka dezaketen ikusteak.
Osasunak ezin izan zuen ezer ere egin etxekoen joko erauntsiaren aurka. Zelai
erdia ondoratu egin zen, eta Nino, Lamah eta Ibrahima motzean lotu zuten
atzelariek. Defentsak bakarrik eutsi zion trinko. Miguel Flañok eta Sergiok
hormak ziruditen, eta beraien ondora gerturatzen zen baloi oro hortik kanpora
errebotatu zuten.
Baino Realeko jokalariek hormaren gainetik
pasatzea lortu zuten guztietan Andres Fernandez izeneko harresi batekin egin
zuten tupust, eta ez zuten zulorik aurkitu han. Temati baloia behin eta berriz
jaurtiki arren, sendo eutsi zuen Nafarroako harresiak. Aurten egin du debuta
Lehen Mailan —2007/08 denboraldian Almeriaren aurka partida bat jokatu zuen—,
Huescan lehengo urtean Bigarren Mailako Zamora saria jaso ostean, eta oso
itxura ona ematen ari da. Bera da Osasuna Europa postuetan egoteko erantzule
nagusietako bat. Asier Riesgo eta Ricardo bezalako bi atezaini aurre hartzeko
ona izan beharko.
Atzokoan erakustaldia eman zuelako Fernandezek.
Lehen zatia amaitu zenean, hamaika aldiz iritsi zen Reala gorritxoen areara.
Lehen minututik jaun eta jabe izan ziren donostiarrak. Aurreko partidetan
bezala, Aranburu eta Elustondok aginte makila hartu zuten, baita orkestra
zuzendariaren rola hartu. Osasuna min gutxi egiten ari zela ikusita, Cadamuro
eta Estrada erasoan hasi ziren. Griezmannek, Velak eta Agirretxek sasoiko eta
gol gosez daudela erakutsi zuten. Puñal eta Nekunam noraezean ibili ziren,
euripean itota. Baloi baten atzetik hura ezin harrapatu dabilen mutikoak
ziruditen. Griezmann eta Vela bihurrikeriak egiten hasi ziren, area kanpotik
gutxigatik kanpora joan ziren jaurtiketekin. Agirretxek beste behin ere
sekulako erakustaldia eman zuen, bizkarrez ongi baino hobeto jokatu zuen, eta
jokaldiak amaitu ez ezik, goleko pasa ugari eman zituen. Atsedenaldira iritsi
zenean, argi zegoen zeinek jokatu zuen gehiago: zortzi gol aukera garbi izan
zituen Realak, eta hamar korner atera zituen; Osasunak bat bera ere ez.
Bigarren zatiak Jose Luis Mendilibar Osasunako
entrenatzailea aldaketak egiten saiatu zen arren, ez zen aldatu jokoaren
norantza. Joko erauntsiarekin jarraitu zuten txuri-urdinek, lehen zatiko
protagonista berberekin. Behin eta berriz erasotzearen poderioz, gola sartuko
zutenean. Kaskagorkerian tematuta saria izango zutelakoan. Prieto eta Ifran
Agirrretxe eta Velaren ordez zelairatu zituen, eta uruguaiarrak aukera garbia
izan zuen. Baina, ezetz asmatu? Atezainak geratu zuen baloi hura. Azken
minutuetan indarrak zertxobait berdindu ziren. Koparen nekea nabari zitekeen
txuri-urdinen artean azken minutuetan. Lehen minututik azkenera arte nagusi
izan zen Reala, jaun eta jabe; Osasunak ez zuen argudiorik izan. Baina golik
gabe ez zoaz inora, eta txuri-urdinek bai aurrelarien hutsengatik eta punteria
faltagatik, baita ere Andres Fernandezek sekulako partida egin zutelako ez zuten
golik sartu. Hala, golik gabe amaitu zen partida, eta puntu batekin itzuli
ziren gorritxoak Iruñera. Realak gehiago merezi izan zuen, baina ezin izan zen.
Jaitsiera postuetatik gertu jarraitzen dute donostiarrek, gertuegi. Sailkapena
ez da azken hilabeteetan erakusten ari den jokoaren erakusle, baina puntuak
pilatzeko beharra du Philippe Montanierren taldeak. Orain Mallorkaren aurkako
partidan pentsatzeko garaia da. Kopan zerbait handia egiteko gogoz dira
jokalariak.
Partidako onenak:
3.- Elustondo: Orain dela gutxi lagun bati esan
nion ez nuela gogoratzen zenbat urte neraman Reala zelaierdian jaun eta jabe
izan zela sumatu gabe. Badira bi-hiru partida hori sumatzen ari naizela. Horren
erantzule nagusienetako bat Gorka Elustondo da. Juanma Lillorekin eta Chris
Colemanekin eman zituen zertzelada apurrak oraindik barnean zituela erakutsi du
beasaindarrak. Bere jokoarekin esperantza gutxien zegoenean, gainera. Berri
pozgarria.
2.- Griezmann: Itzuli da zaleak zutik jartzen
zituen jokalari hura. Udaran burua galdu ondoren, zelaian hitz egitea erabaki
du Maçonekoak. Barnealdi bat baino gehiago egin zituen, eta baloian gola
idatzita zeramaten jaurtiketa bat baino gehiago. Pena ez asmatu izana.
1.- Aranburu: Elustondo bezala, bera da Realaren
joko onaren beste erantzuleetako bat. Gazte dago, sasoiko. Orain ez du
hainbeste eramaten baloia lehen egiten zuen bezala, orain azkarrago pasatzen
du. Beti ondo kolokatuta dago azpeitiarra.
2 comentarios:
SALUDOS,,Y FELIZ AÑO NUEVO A TODOSSSSSSSSSSSS
Igualmente txapeldun!!!
Publicar un comentario