OINAK LURREAN, DERBYA ORAIN

Oinak lurrean ematen dira pausoak. Kopa besterik ez da egon guztien ahotan; Mallorkaren aurkako garaipena, joko bolada ona, Athleticen aurkako balizko kanporaketa, maiatzeko finala... eta konturatu gabe derbya iritsi da Anoetara. Txuri-urdinek Jose Luis Mendilibarren Osasuna hartuko dute Anoetan (18:00, C+L2, PPV), Ligan. Bosgarren doaz nafarrak, eta donostiarrek bi puntura dituzte jaitsiera postuak. Amets egitea ongi dago, indarra ematen du, baina tentuz ibiltzea eta aurkariak ez gutxiestea garrantzitsua da.

Osasunaren aurkako derbyak ez dira Athleticen aurkakoak bezalakoak. Badago grina, badago bi taldeko zaleen arteko amodio-gorroto erlazioa, baina ez dira bilbotarren aurka bezainbeste bizi. Eta gaurko derbya azken urteetako urardotuena da. Ligako atsedenaldiak eta Kopak haren oihartzuna txikitu duelako. Baina asko dago jokoan, urrezko hiru puntu lasaitasuna emateko, eta derby batean zuzeneko aurkari bati irabazteko. Kopan ere eragin dezake gaurko partidak, irabaziz gero jaitsiera postuak urrutiago izango dituzte txuri-urdinek; galduz gero, berriz, Ligako egonezinak ez du utziko Kopaz gozatzen, eta batek baino gehiagok ordezko jokalariak erabiltzeko eskatuko du.

Deialdian bi aldaketa egiten ditu Montanierrek: Claudio Bravo deialdira itzuliko da Toño Ramirezen ordez, eta Diego Ifranek Joseba Llorenteren lekua hartuko du. Hondarribiarra ez dabil fin, eta joko bolada ona aurkitu gabe dirau. Aurrelari uruguaiarrak, berriz, bigarren zatian minutuak izan ditzake, eta taldeari ekarpen handia egiten diola erakutsi nahi izango dio beste behin ere entrenatzaileari. Jokalari desberdina da Ifran, grinatsua, elektrikoa, beste zera hori duen horietako, baina Montanierrek ez du begiko, eta zaila izango du entrenatzailearen iritzia aldatzea.

Ezustekorik ezean, Mallorkaren aurkako hamaikako oso antzekoa jarriko du jokoan Montanierrek. Bravok tokia kenduko dio Zubikarairi, eta Velak Prietoren tokia har lezake. Oraingoz ez dirudi Montanierrek aldaketak egingo dituenik nekea saihesteko, baina baliteke gaur hastea errotazioekin. Alde guztietatik kritikak jaso ostean, bost partida darama galdu gabe Realak Ligan, eta oreka aurkitu duela dirudi. Montanierrek ez ditu hainbeste zalantza eragiten jada, eta zelai erdiko konexioa fruituak ematen ari da. Elustondok, Aranburuk eta Zurutuzak ondo baino hobeto ezagutzen dute elkar, eta Illarramendik utzitako hutsunea ondo bete dute. Marigak, berriz, ez du maila eman, eta baliteke taldea uste baino lehen uztea.

Osasuna, uste baino hobeto

Reala bolada onean egon arren, gogorra izango da partida. Osasuna uste baino hobeago ari da, eta Europako postuetan dela iritsiko da Anoetara. Bosgarren dago 25 punturekin, Realak baino zortzi gehiago. Txapeldunen Liga lau puntura dute gorritxoek. Futbol ederregia egin gabe, eta ahotsa behar baino gehiago altxa gabe puntuak pilatu eta pilatu ari dira. Bartzelonaren eta Real Madrilen aurka lotsagarri geratu arren, itxura ona eman dute beste partidetan. Talde trinkoa osatu du Mendilibarrek, eta jokalariek aurkarien ahultasunak ustiatu dituzte. Sei jokalari ditu min hartuta entrenatzaileak: Etxaide, Masud, Kike Sola, Ruben, Roversio eta Raul Garcia. Guztiak deialditik kanpo geratu dira beren lesioengatik. Azkenekoaren ordez Timor gaztea ariko da punta erdi lanetan. Hartara, jokaldi geldituetan arrisku handia izango dute, Nekunam eta Flaño bezalako jokalariekin. Montanierrek eman du abisua zentzu horretan. Aurrean gola erraietan duen Nino beteranoak jokatuko du, eta bi hegaletan jokalari azkar eta trebeak ditu: Ibrahima eta Lamah. Biek ala biek zur eta lur utzi dituzte zale gorritxoak, eta pozarren dira ematen ari diren errendimenduarekin.

Kopatik urrun du burua gainera Osasunak. Bartzelonaren aurkako kanporaketa zaila izango zela bazekiten hasieratik, ezinezko hitza erabili zuen Mendilibarrek, eta Nou Campen 4-0 galdu ondoren ez dago esperantzarik Iruñean. Hautsak harrotu ditu dena den partidak, ustez gripeak jota zegoen Messik sekulako partida egin eta bi gol sartu zituelako. Mendilibarrek eta Patxi Izcok adierazpen gogorrak egin dituzte argentinarraren aurka. Zaldibarkoak “aurpegira barre” egin diela esan du haserre, eta presidenteak Messik gripea bazuen, berak “barrabiletako mina” zeukala esan zuen; literalki.

Berri on bakarra izan zuen asteazkeneko partidak Osasunarentzat. Atezain on bakarra ez eta bi —edo hiru Ricardo kontuan hartuz gero— dauzkatela argi geratu zen. Asier Riesgo Realeko jokalari ohiak sekulako erakustaldia eman zuen. Lau gol jaso zituen, baina izan zitezkeen zortzi lasai asko. Trukean errege oparia jaso dezake, eta hasierako hamaikakoan izateko aukera dezente ditu. Debatarrarentzat berezia izango da ziur Anoetara itzultzea.

Deialdia:

Real Sociedad: Bravo, Zubikarai; Estrada, Mikel Gonzalez, Ansotegi, Cadamuro, Demidov, De la Bella; Xabi Prieto, Pardo, Zurutuza, Elustondo, Aranburu, Mariga, Griezmann; Vela, Agirretxe, Ifran

Osasuna: Andres Fernández, Riesgo; Damia, Lolo, Satrustegi, Miguel Flaño, Raitala, Sergio; Annunziata, Calleja, Cejudo, Lamah, Nekunam, Puñal, Timor; Ibrahima, Lekic eta Nino