AMESTEA ZILEGI DA

Begiak irekita egin zuten amets atzo Anoetako harmailak bete zituzten zaleek. Iragana, oraina eta etorkizuna, guztiak elkarrekin. Iragana, aspaldi ikusi gabeko jokoa ikusi baitzen zelaian, 2002-2003tik ikusi gabea bederen; oraina, partida bikainaz gozatzeko aukera eman zuelako taldeak Rayo Vallecano 4-0 jipoituta; eta, nola ez, etorkizuna, taldeak hemendik gutxira pozteko arrazoiak eman baititzake. Bai, Realarekin amestea zilegi da.

50 partida Realeko entrenatzaile gisa igaro ondoren, Montanierrek azkenean Pardo eta Illarramendiri eman die zelai erdiko aginte makila. Beharrak jota egin zuen apustua Malagan, eta ezin hobeto atera zen, arerio indartsu bat menderatuta. Markel, Griezmann eta Zurutuza osatuta, zalantza handiak zeuden frantziarrak jarriko zuen hamaikakoarekin. Baina Montanierrek jarraipena eman zion iragan asteko taldeari, eta jokalariek bikain erantzun zuten.

Hamaikako dinamikoa, azkarra, erasokorra zelairatu zuen, baloia hanketan gozatzen duen taldea. Dinamita hutsa Rayoren atzeko lerro aurreratuaren aurrean. Madrileko taldeak atera bezain pronto urkatu zuen bere burua. Minutu bakarra behar izan zuen Realak lehenengo gola sartzeko. Pardok pase ikaragarria eman zion Ifrani, honek baloia sorbaldarekin eraman eta baloia sareratu zuen. Mateu Lahozek, baina, eskuarekin eraman zuela erabaki zuen eta txartel horia erakutsi zion uruguaiarrari. Epailea Ifranen bizkarrean zegoen eta ezin izan zuen jokaldia ongi ikusi, marrazaina hobeto kokatuta zegoen eta ez zuen ezer adierazi. Dena den, jokaldia baliogabe gelditu zen.

Realak, dena den, berdin jarraitu zuen. Zelai erdian baloia azkar lapurtu eta hegaletara irekitzen zuen. Illarramendik baloi andana lapurtu zituen, motzean, erraz Pardorekin jokatu eta honek jokoa zabaltzen zuen. Pase motzak, luzeak, aurkariari iskin egin... erakustaldia eman zuten mutrikuarrak eta errioxarrak. Baloia erasoko laukotera iristen zenean, zurrumurruak gailentzen ziren harmailetan, arriskua gertu zegoela jakitun. Chory nekaezin aritu zen, alde batera eta bestera korrika etengabean; Prietok denboraldiko partida onena jokatu zuen aurkariak ernegatuz; Velak bere maila onena eman zuen eta Ifranek minutu gehiago jokatzea merezi duela aldarrikatu zuen.

Ez zen gola iristen, baina denbora kontua zen. Velak estreinako gola sartu aurretik, epaileak beste hutsegite larri bat egin zuen. Choryren jaurtiketa bikaina eskuarekin urrundu zuen Galvezek, baina Mateu Lahozek ez zuen ikusi nahi izan. Realaren nagusitasuna agerikoa zen, baina pare bat minutu nahikoa izan ziren partida hankaz gora jartzeko. Bi minututan bi gol sartu zituen Velak. Lehena Ifranen saiakera batean area barnean jaberik gabe zegoen baloi bat sartuta, eta, bigarrena Realak eginiko jokaldi bikaina maisuki amaituta. Illarramendik lehenik, eta Pardok, ondoren, jaurtitzeko imintzioa egin zuten, Vela bakar-bakarrik uzteraino.

2-0ekoak nahikoa zirudien. Rayo txikituta zegoen, baina Realeko jokalariek ez zuten nahiko. Cobeño atezainarengatik ez balitz, lau edo bost goleko tartearekin iritsiko ziren txuri-urdinak atsedenaldira. Aurrena Pardoren bolea bikaina gelditu zuen, Iñigo Martinezen burukada ateko marran atera zuen ondoren, eta azkenen Ifranen jaurtiketa-erdiraketa bat urruntzen asmatu zuen. Lehenengo 45 minutuetan ez zen Rayoren berri egon, Leo Baptistao aurrelari gazte eta abilak egindako pare bat jokaldi bakarrik.

Bigarren zatian arriskatu egin zuen Paco Jemezek. Casado atzelaria kendu eta Delibasic aurrelaria sartu zuen. Hiru atzelariko defentsa gozamena izan zen txuri-urdinentzat. Lehen minutuetan Rayoren saiakerak eutsi eta gero, nahi bezala jokatu zuten donostiarrek.

Aurrelariak lan handia egin zuten defentsan eta Pardok eta Illarramendik baloi ugari lapurtzen jarraitu zuten. Une gozoan zegoen taldea eta saiatzen ziren jokaldi guztiak ondo ateratzen ziren. Hala, Mikel Gonzalezek enegarren baloia berreskuratu zuen, eta erdilari bati pasa beharrean aurrera egin zuen, Xabi Prietori baloia zabaldu eta aurrerago jarraitu zuen. Ifranek buruz errematatu zuen, eta Rayoko jokalariek baloia aldenduko zutela zirudienean, Gonzalez agertu zen baloia sareetara bidaltzeko.

Osasunaren partida gertu dela jakinda, hainbat jokalariri atseden ematea erabaki zuen Montanierrek. Ifranek gutxi jokatu du orain arte eta akituta zegoenez, Markel sartu zuen bere ordez. Zelai erdia sendotzea eta Rayok golik ez sartzea zuen helburu aldaketak, baina zaleek ez zuten begi onez ikusi. Geroago Pardok eta Velak txalo zaparrada batekin utzi zuten zelaia eta Zurutuzak eta Agirretxek minutuak izan zituzten. Aldaketaren aurretik, Pardok goleko beste pase bat eman zuen. Choryk ezkerrez sasoiko bigarren gola sartu zuen. Lau izan ziren baina beste lau izan zitezkeen, hazita baitzegoen Reala. Iñigo Martinezek eta Carlos Martinezek zelai erditik, Pardok area kanpotik, Markelek langara, Agirretxek buelta erdian... Guztira 23 jaurtiketa, horietako 11 atera.

Pardo eta Illarramendirekin aspaldiko partida onena jokatu zuen Realak. Bide ona hartzear dela dirudi. Europa hiru puntura dago eta Txapeldunen Liga laura. Horrek ez ditu txuri-urdinak itsutu behar, baina hor gertu dagoela jakiteak ez du minik ematen. Ostiralean Osasunari irabaziz gero, Europako Ligako postuetan sartuko da Reala, aurkariek zer egin jakin arte behintzat. Beranduegi, baina Montanierrek arrazoia eman die zaleei, talentu handiena duten jokalariak elkarrekin jarrita. Dena den, Rayo jokatzen uzten duen taldea da, eta horrek erraztasunak eman zituen. Osasunaren aurkakoa oso desberdina izango da, eta, gainera, lau eguneko atsedena izango dute jokalariek soilik. Horregatik, ez litzateke harritzekoa hamaikakoan aldaketak egotea. Griezmannek eta Zurutuzak hasieratik joka dezakete, Chory, Ifran edo Pardoren ordez. Horrek ez luke zaleen haserrea piztu behar, ulergarria eta mesedegarria izan daitekeelako.

Jokalari onenak:

3. Ruben Pardo: Paseko bi gol, eta baliogabe utzitako beste bat. Pase luzeak, motzak, baloi ugari ostu... Aspaldi ez zen hain maila oneko erdilari bat txuri-urdinez jantzita ikusi Anoetan. Erakustaldia.

2. Asier Illarramendi: Pardoren ezkutari fina. Zeinek zioen ezin zuela 4 gisa jokatu. Mutrikuarrak baloi mordoa lapurtu zituen eta erraz jokatu zuen Pardorekin. Errioxarrak ezin zuenean, bera izan zen zelai erdiko motorea. Izugarrizko partida

1. Carlos Vela: Reala nagusi zen baina ez zuen gola sartzen, Vela agertu zen arte. Bi gol bi minututan eta partida bideratua. Hirugarrena gertu izan zuen eta min handia egin zuen. Goi mailako jokalaria.