IRRIBARREA AHORA ITZULI DA

Kolpe latzenak jaso ondoren berriz ere altxatzean datza handitasunak. Bizitza ez da samurra, ezta ere futbola. Sei muturreko gogor jaso zituen Realak asteazkenean, oinazeak uzten dituzten horietakoa. Belauniko geratu zen, buru makur, ubeldura ugarirekin. Egoera horri aurre egiteko eta altxatzeko handia izan behar da, eta gauza bat izan behar da guztiaren gainetik: Jarrera.

Nortasuna erakutsi zuen Realak Mestallan. Partida serioa egin zuen oraingoan. Valentziaren ahuleziak ikusi, eta etekina ateratzen saiatu zen. Zelaierdian ito zituzten aurkariak, eta hor hasi ziren hiru puntuak irabazten. Pena da Aranburuk jada 32 urte izatea, urte askorako zelai erdia osa zezakeelako Elustondorekin eta Zurutuzarekin. Montanierren iparrorratza da harrobiko hiru jokalariak. Taldearen jokoari oreka ematen diote, defentsa lanak erruz egiten dituzte, eta erasoa beraiek hasten dute.

Atzokoa, akaso ez zen partida borobila izan, baina egin beharrekoa egin zuen Realak. Dir-dir egiteko badaude beste partida batzuk, ez Ligako hirugarren sailkatuaren aurka jokatzen dena. Unai Emeryk errotazioak egitea erabaki zuen, Victor Ruizi eta Jordi Albari atseden emanda; Roberto Soldadoren faltarekin bat. Hala eta guztiz ere, hiru puntuen bila atera zen Valentzia hasieratik. Ever Banega eta Dani Parejo jokoa antolatzen saiatu ziren, eta Feghoulik min egin zuen bere hegaletik. Liassine Cadamuro etengabe bilatu zuen etxeko taldeak, baina ezker hegalekoa txukun aritu zen. Argeliako hautatzaileak begiz jo du, eta laster egin dezake debuta Afrikako selekzioarekin.

Minutuak pasa ahala, Valentzia urduri jartzen hasi zen Realaren presio ona gainditu ezinda. Zaleek ez zuten lagundu, bere taldea arerio apal baten aurka berdintzen egotea ezin ulertuta. Horrela, Realak urduritasuna gainetik kendu, eta erasoan saiatzeari ekin zion. Imanol Agirretxek lan eskerga egin zuen, aurreko partidetan bezain fin aritu ez bazen ere. Xabi Prietok hobera egin zuen, eta Dani Estradaren laguntza izan zuen. Ez zuen aukera garbirik eduki Realak lehenengo zatian, baina Diego Alves atezainaren inguruetara hurbildu zen.

Bigaren zatian martxa bat gehiago sartzen saiatu zen Valentzia, hiru puntuak ez eskuratzea onargarria ez zela pentsatuta. Baina, halako batean Antoine Griezmann agertu zen. Hiru laurdenetan baloia hartu, bi jokalariren artean sartu, jaurtiki, haren erremateak Valentziako jokalari batean eman, alboratzeak hankan aurrena eta gero nahigabe eskuan eman, berriz ere jaurtiki, baloiak Valentziako jokalari berean eman, eta Alvesen gainetik sartu zen barrura. Jokaldi arraroa, errebotez betea, baina gola; eta legezkoa, Griezmannek nahi gabe eman ziolako baloiari. Ordu erdi baino gehiago geratzen zen, eta argi zegoen etxeko taldea golaren bila joango zela. Bi pauso aurrera eginda, erasoan saiatu zen Emeryren taldea. Baina Reala ez zen kikildu. Serio ibili zen atzean, eta ez zuen asko sufritu. Claudio Bravok bizpahiru geldiketa egin behar izan zituen soilik. Kontraerasoan, eta aurkariak utzitako hutsuneak probestuz, aukera garbi batzuk izan zituen Realak, Agirretxeren eta Griezmannen eskutik, baina ez ziren fin ibili.

Zorrak kitatu behar zituen Realak, eta zauria oraindik irekita dagoen arren –denbora asko beharko du osatzeko-, hasi da nolabait zorrak kitatzen. Sinbolismoz beteriko zauri bat itxi zuen gainera. Mestalla zorigaiztoko zelaia da txuri-urdinen oroitzapenetan. 2007ko igande ilun batean Reala Bigarren Mailara jaitsi zen valentziaren aurka galdu eta gero. Atzoko garaipena nolabaiteko mendekua izan zen, duela bost urte malko txuri-urdinak isuri zituzten horien omenez. Irribarrea txuri-urdinen ezpainetara itzuli da, eta orain estatistikak lagun ditu berriz ere. Ligan zazpi partida daramatza galdu gabe –hiru garaipen eta lau berdinketa-, eta horrela jarraitzeko asmoa duela esan zuen Philippe Montanierrek prentsaurrekoan. Igandeko partidak kontuan izan gabe, Europa lau puntura dago, eta jaitsiera bostera. Egin irri!

Jokalari onenak:

3.- Antoine Griezmann: Zelaian hitz egitea erabaki zuenetik, taldeko jokalari onena bihurtu da. Asko behar zuen Realak frantziarraren talentua eta freskotasuna. Xabi Prietok bere txakalaldian jarraitzen duen honetan, ezinbestekoa da Griezmannen ekarpena.

2.- Gorka Elustondo: Orain urte batzuetako aurreikuspenak betetzen hasi da pixkanaka. Azken bi urteetan itxura kaskarra eman ondoren, inork gutxi zuen konfiantza Beasaingo euskarriaren jardunarekin. Baina kritiko guztiak isildu ditu. Baloia eskatzen du, gora igotzen da azken pase bila. Finean, presentzia du.

1.- Mikel Aranburu: Reala Ligan zazpi partida galdu gabe egotearen erantzule nagusietako bat da kapitaina. Zelaierdi sendoa osatzen du Elustondorekin eta Zurutuzarekin. Beti ongi kolokatuta eta pase errazak ematen. Bikain.