KOSKORTZEKO GARAIA

Celtaren aurkako garaipenaren eta joko onaren ondoren, piztu da itxaropenaren zuzia. Denboraldi-aurrea ere itxaropentsua izan da, eta zaleak pozarren daude etorri diren fitxaketekin. Alaitasun horrek irudimena abian jarri du, eta Realak zerbait handia egin dezakeela uste du batek baino gehiagok. Baina horretarako azken denboraldietako gabezia bat findu beharko dute txuri-urdinek: etxetik kanpo irabaztea. Anoeta gotorleku bat izan daitekeela argi geratu da, baina orain beste gotorlekuak setiatzen hasi behar da. Horregatik, Realak Europako gailurrera benetan igo nahi badu, Mallorcaren aurkako partidatik (LaSexta, 22:00) hasi beharko du puntuak pilatzen.

Ez da erraza izango. Urtarrilaren 14ean irabazi zuten azkenekoz etxetik kanpo; Valentziaren aurka 0-1 Griezmannen golarekin. Gainera, Iberostar zelaiak ez dakartza oroitzapen onak. Espainiako Kopako kanporaketa oroitzeak mingarria izaten jarraitzen du, eta Ligan ere galdu egin zuten txuri-urdinek. Atzerago begiratzeak ere ez du laguntzen, Mallorcan jokaturiko azken 24 partidetatik hiru irabaziz dituztelako soilik, eta zazpi berdindu. Hamalau aldiz itzuli ziren esku hutsik. Kopako partida madarikatu horretako bi protagonista —Zubikarai eta Chory Castro— ez dira biharko partidan izango, biak arazo fisikoekin baitaude.

Celtaren aurkako garaipenaren aparretik jaitsita, eta Mallorcakoaz ahaztuta, kirol arloz kanpoko gaiak nagusitu dira aste honetan Zubietan. Bayer Munichek Javi Martinezen etete klausula ordaindu izanak, 40 milioi eurorekin utzi du Athletic, eta horrek beldurra eragin du A8aren alde honetan. Ez da Athletic Zubietara arrantza egitera etorri den lehen aldia, eta, tamalez, ez da azkena izango. Iñigo Martinez, Pardo eta batez ere Griezmann izan dituzte jomugan, ustez bere filosofian balizkoak diren hiru jokalari. Hirurek eman dituzte prentsaurrekoak, eta zaleak baretu dituzte. Mezua berbera izan da: “Etxean gaude, eta ez gara mugituko”. Badaezpada ere, frantziarraren kontratua urtebetez luzatu du Realak, 2016raino, eta soldata nabarmen igo dio.

Asteko beste protagonista lesioak izan dira. Zurutuza eta Iñigo Martinez bere sendatzearen azken txanpan daude, eta senda-agiriarekin bidaiatu dute Mallorcara. Deialdia 19 jokalarikoa da eta litekeena da bietako bat izatea deialditik at geratzen dena. Aurretik aipatutako Zubikarai eta Chory Castroz gain kanpoan geratu dena Elustondo izan da. Ondarrutarraren ordez, Royo harrobiko jokalariak bidaiatu du eta Beasaindarraren lekua Rosek bete du. Uruguayarrak bigarren itzulira arte itxaron beharko du bere taldekide ohien aurka jokatzeko.

Montanier errotazioen lagun izanik, ikusteke dago ze jokalarik jokatuko duten bihar. Iñigo Martinez guztiz sendatuta baldin badago, Ansotegiren lekua hartuko du. Gaur egun taldeak duen atzelaririk sendoena da Martinez, eta zaleek faltan botatzen dute. Ezker hegalean De la Bellak jarraituko duela dirudi, Celtaren aurka nahiko itxura ona eman ondoren. Zelai erditik aurrera datoz zalantza guztiak. Griezmann euskarri lanetan ala hegaleko gisa? Zurutuzaren lehen minutuak? Markel baloiak berreskuratzeko edo Illarramendi hobeto? Pardo behingoz hasieratik? Ezustea, eta Ros?

Jarraitzaile txuri-urdinak entretenituta egongo dira behin-betiko hamaikakoa jakin arte. Griezmannek hasieratik jokatuko duela dirudi. Sasoikoen dagoen jokalaria da uneotan, eta luxu bat da hura aulkian egotea. Euskarri gisa jokatzen badu, Prietok, Velak eta Agirretxe ariko dira erasoan; hegaleko bezala ari bada, hiruetako bat eseriko du. Iaz etxetik kanpo Montanierrek egiten zituen hamaikakoei begira, usurbildarra izan liteke kaltetua. Dena den, kontuan hartzeko datua da Agirretxek Mallorcari iaz hiru gol sartu izana. Balizko hamaikakoetan galtzeko adina aukera ditu Realak aurten.

Itxaropenaren ikurrina astinduz, hiru punturekin itzultzeko fedea du taldeak. Denboraldia ondo hastea garrantzitsua izango da lan talde gaztearentzat. Bartzelonaren aurkakoa ahaztuta, geraldiaren aurretik bigarren garaipena lortzea ona litzateke. Anoetako hurrengo partida Zaragozaren aurka izango da, eta gero Valentzia aldera bidaiatuko du taldeak Levanteren aurka jokatzeko. Puntuak pilatzen jarraitzeko partida aproposak izan daitezke. Dinamika onean hasteak presioa kenduko lieke gaztetxoei, eta presiorik gabe beren maila onena emango lukete.

Caparrosen oreka

Baina airean gazteluak eraikitzen hasi aurretik, lehen urratsa Mallorcaren aurka jokatzea da. Ez da partida erraza izango. Caparrosek urtebete darama jada uhartean, eta hobeto ezagutzen ditu bere jokalariak. Horrez gain fitxaketa onak egin ditu udako merkatuan.

Talde sendoa eraiki du, deserosoa, jokalari beteranoak gaztetxoekin tartekatuta. 4-4-2 taktikarekin jokatzen jarraitzen du Caparrosek, eta presio itogarri baten bitartez aurkariak ernegatzen saiatzen da. Atean eskarmentu handiko atezaina du: Aouate. Gaztetasun eta eskarmentuaren arteko oreka hegaletan ikus daiteke. Eskuinean Ximo Navarro gazteak jokatzen du, eta ezkerrean, Atletico Madrileko kapitain ohi Antonio Lopezek. Erdiko atzelarietan Nunesek hamabi urte ateratzen dizkio Bigasi. Geromel eta Coincencao brasildarrek gogor entrenatu beharko dute Bigasi lekua kentzeko.

Postuz postu sortu du oreka Caparrosek. Zelai erdian kalitatea Javi Marquezek jartzen du, eta, lana, Pinak. Bietako bat falta bada, hor dago Marti beteranoa laguntza emateko. Eskuin hegalean Realen urtebete ibili zen Nsue ari da eta ezkerrean Pereirak bete du Chory Castroren hutsunea. Bi jokalariak abilak dira, indartsuak, eta erne ibili beharko dute atzelariek. Erasoan Realeko beste ezagun batek jokatzen du: Victor Casadesus. Baina atzelariek hobe dute Casadesus ez ezik, Hemed ere gertutik jarraitu. Bi partidatan hiru gol sartu ditu, sasoiko dago, eta bere bolada ona mantentzen saiatuko da israeldarra.

Geromel, Conceiçao, Antonio Lopez, Javi Marquez eta aipatu gabeko Arizmendi —min hartuta dago— boskotearen gain, Giovani Dos Santos mexikarra fitxatu dute azken unean. Milioi bat euro inguru ordainduta ekarri du Ingalaterratik bueltan Mallorcak, fitxaketa ona eta errentagarria ziurrenik. Dena den, ez da Realaren aurkako deialdian sartu. Azken unera arte Zigicen atzetik ibili ziren, baina serbiarrak Birmingham taldearekin izandako arazoak medio, etorri barik geratu da azkenean.

Deialdiak:

Reala: Bravo, Royo; Estrada, Mikel Gonzalez, Ansotegi, Iñigo Martinez, Cadamuro, De la Bella, Jose Angel; Markel, Illarramendi, Pardo, Zurutuza, Ros; Griezmann, Xabi Prieto, Vela, Agirretxe eta Ifran.

Mallorca: Aouate, Miño; Antonio Lopez, Nunes, Conceiçao, Geromel, Ximo, Bigas; Charlie Took, Joao, Pina, Pereira, Nsue, Javi Marquez, Marti; Alfaro, Marc Fernandez, Victor eta Hemed